ABŞ prezidenti Venesuela neftinin dayanmasının Havananı çöküşə yaxınlaşdırdığını bildirib...
Poliqon xəbər verir ki, ABŞ prezidenti Donald Tramp Ayova ştatına səfəri zamanı Kubanın Venesueladan neft tədarükünün kəsilməsindən sonra ciddi iqtisadi və siyasi böhranla üz-üzə qaldığını açıqlayıb. Onun sözlərinə görə, ada dövləti hazırda faktiki olaraq çökmə həddinə çatıb.
Donald Tramp bildirib ki, Kuba uzun müddət Venesueladan maliyyə dəstəyi və neft alıb, lakin bu mənbələr artıq mövcud deyil. “Kuba hazırda çökməyə çox yaxındır. Onlar Venesueladan pul və neft alırdılar. İndi isə bunu almırlar”, — deyə ABŞ prezidenti vurğulayıb.
Yanvarın 24-də Politico qəzeti yazıb ki, Tramp administrasiyası Kubaya Venesuela neftinin tədarükünü dayandırmaq məqsədilə dəniz blokadası tətbiq etmək imkanını müzakirə edir. Nəşrin mənbələrinə görə, ABŞ dövlət katibi Marko Rubio neft blokadası ideyasını dəstəkləyir, lakin bu məsələ ilə bağlı hələlik yekun qərar qəbul edilməyib.
Bundan əvvəl, yanvarın 22-də The Wall Street Journal qəzeti mənbələrə istinadən xəbər verib ki, ABŞ prezidenti Donald Trampın administrasiyası 2026-cı ilin sonuna qədər Havanadakı hakimiyyəti dəyişmək üçün Kuba hökuməti daxilində əlaqələr axtarır.
Qəzet qeyd edir ki, bu ssenari Venesuela prezidenti Nikolas Maduronun devrilməsindən sonra “ruhlandırıcı” hesab edilən siyasi dəyişikliklər fonunda gündəmə gəlib. ABŞ administrasiyası Kubanın iqtisadiyyatını “çökməyə yaxın” kimi qiymətləndirir və mənbələrin iddiasına görə, ölkə hökuməti əsas strateji müttəfiqini itirdikdən sonra heç vaxt indiki qədər zəif olmayıb.
Poliqon.info
