Bakı, 28 yanvar, AZƏRTAC
Azərbaycan Milli Elmlər Akademiyasının (AMEA) Nizami Gəncəvi adına Ədəbiyyat İnstitutunda İraq-Türkman ədəbiyyatına dair yeni kitab nəşr olunub.
Bu barədə AZƏRTAC-a Ədəbiyyat İnstitutundan məlumat verilib.
Bildirilib ki, Əməkdar elm xadimi, professor Qəzənfər Paşayev və filologiya üzrə fəlsəfə doktoru Orxan İsayevin müəllifi olduqları “İraq-Türkman ədəbiyyatı tarixi” monoqrafiyasında İraqda yaşayan soydaşlarımızın yaradıcılığı ilk dəfə mərhələlərə bölünüb, inkişaf istiqamətləri müəyyən edilib.
Bundan əlavə, “İraq-Türkman ədəbiyyatı tarixi”ndə türkmanların yazılı ədəbiyyatı ilə yanaşı, şifahi xalq ədəbiyyatı da öz əksini tapıb, əsər Azərbaycan ədəbiyyat tarixçiliyi prinsiplərinə uyğun şəkildə yazılıb. Kitaba yazılmış “Ön söz”ün müəllifi AMEA-nın prezidenti akademik İsa Həbibbəyli, redaktorları Mustafa Ziya, Şəmsəddin Kuzəçi, rəyçilər isə professorlar Məhərrəm Qasımlı, Məmməd Əliyev, Nizami Tağısoy və filologiya üzrə fəlsəfə doktoru Səkinə Qaybalıyevadır.
