Son illər azərbaycanlıların xarici ölkələrin daşınmaz əmlak bazarında fəallığı müşahidə olunur. Xarici ölkələrdə daşınmaz əmlaka investisiya yatırmaq gəlirli biznes sahələrindən sayılır.
Azərbaycan vətəndaşlarının əmlak almağa ən çox yönəldiyi ölkə isə əsasən, qardaş ölkədir. Vətəndaşlarımız ötən ay Türkiyədə 113 mənzil alıblar. Bu barədə Türkiyə Statistika Təşkilatının (TÜİK) dekabr ayı üzrə açıqladığı mənzil satışı statistikasında bildirilib. Beləliklə, azərbaycanlılar Türkiyədə ən çox mənzil alanlar siyahısında 5-ci yerə yüksəlib.
Dekabr ayında ölkədə xarici vətəndaşlara 2541 ev satılıb. Bu satışlar illik müqayisədə 5,1% artıb. Xarici vətəndaşlara ev satışının ümumi ev satışlarında payı isə 1% olaraq hesablanıb.
Mövzu ilə əlaqədar əmlak eksperti Elnur Fərzəliyev Bizim.Media-ya verdiyi açıqlamada bildirir ki, Türkiyədə yaşayan Azərbaycan vətəndaşları həmin ölkədən daşınmaz əmlak alarkən Səfirlik və digər dövlət qurumları tərəfindən Azərbaycan Respublikasına məlumat verilir:
“Demək olar, hər ay Türkiyədən kifayət qədər mənzil alan vətəndaşlarımız var ki, onların bir hissəsi Türkiyədə yaşayanlardır. Türkiyədə yaşamayan azərbaycanlılar belə oradan daşınmaz əmlak alırlar ki, buna səbəb Türkiyənin turizm sektorunun inkişaf etməsi və turistik bölgələrə olunan yatırımlar vətəndaşlara daha böyük investisiya şansı verir”.
Ekspertin sözlərinə görə, hazırda Rusiyada ortalama 2 milyondan artıq Azərbaycan vətəndaşı yaşayır və əksəriyyətinin ikili vətəndaşlığı var:
“Rusiya vətəndaşı olan azərbaycanlılar da oradan kifayət qədər daşınmaz əmlak alırlar. Ancaq onların aldıqları daşınmaz əmlaklarla bağlı ölkəmizə rəsmi məlumatlar gəlmir. Çünki Rusiyada yaşayan azərbaycanlıların çoxu elə vətəndaş olduğu üçün onlar da artıq rus vətəndaşı kimi qeydiyyatdan keçirlər.
Hazırda, xüsusən, paytaxt Bakıda və digər böyük şəhərlərdə daşınmaz əmlak alanların da böyük bir hissəsi xarici ölkələrdə və daha çox Rusiyada yaşayan azərbaycanlılar idi. Amma son illər Rusiyada baş verən müharibə səbəbilə artıq həmin ölkədə yaşayan həmvətənlərimiz Azərbaycandan daşınmaz əmlak almırlar.
Buna səbəb həmin ölkənin iqtisadi vəziyyətinin aşağı düşməsidir. Beləliklə, həmin ölkədə yatırım etmək daha məqsədəuyğun hesab olunur”.
Bəs Azərbaycan vətəndaşları xarici ölkələrdən niyə ev almağa yönəlir?
Ekspertin sözlərinə görə dünyada baş verən qlobal məsələlərlə bağlı artıq nəinki Türkiyədən, Rusiyadan, həmçinin, Avropadan və dünyanın bir çox ölkələrindən əmlak alan vətəndaşlarımız var:
“Bunun bir digər səbəbi isə Avropa ölkələrində daşınmaz əmlaklara bəlli bir yatırım etdikdə həmin ölkə bu şəxslərə vətəndaşlıq və daimi oturma icazəsi verir. Həmçinin, mülkiyyət hüquqlarının tanınması səbəbilə həmin ölkələrdə onların daşınmaz əmlakları olduğu halda, viza rejimi tətbiq olunmadan istədiyi vaxtda bu ölkəyə rahat şəkildə gediş-gəliş edə bilirlər”.
Ekspert Azərbaycanda əmlak alan xarici vətəndaşlar haqqında da danışıb:
“Azərbaycanda da daşınmaz əmlak alan xarici vətəndaşlar var ki, bunların böyük bir hissəsi Azərbaycanda vətəndaşlıq və yaxud oturum almaq istəyən şəxslərdir. Ölkəmizin miqrasiya qanunvericiliyinə əsasən, bir xarici vətəndaş Azərbaycandan 100 min manatdan artıq olan bir daşınmaz əmlak alıbsa və həmin əmlakın bazar dəyəri 5 il ərzində aşağı enməyibsə, həmin xarici vətəndaş Azərbaycanda daimi yaşaya bilər və daha sonra birdəfəlik vətəndaşlıq almaqla bağlı müraciət edə bilər”.
Fatimə Əliyeva, Bizim.Media
