Qərbi Virciniyada bir qadın prezident Donald Trampa qarşı təhdidlər etmək və zorakılıq hərəkətlərinə təhrik etmək şübhəsi ilə həbs edilib.
Cekson Şəhər Şerif Departamenti bu barədə 26 yanvarda Facebook-da şübhəlinin şəklini paylaşaraq məlumat verib. Məlumatda deyilir: “Riplidən olan 39 yaşlı Morqan Li Morrou sosial mediada prezident Trampı izləmək və sui-qəsd etmək üçün şəxsləri cəlb etməsi ilə əlaqədar saxlanılıb və həbs edilib… Morrou terror təhdidləri etməkdə ittiham olunub”.
Şerif Departamenti istintaqın davam etdiyini və bütün faktlar toplandıqdan və təsdiqləndikdən sonra əlavə məlumatların açıqlanacağını qeyd edib.
Hüquq-mühafizə orqanlarının əməkdaşları həmçinin Morrou ilə bağlı hesabatın siyasi xarakter daşımadığını və yalnız cinayət istintaqı ilə bağlı olduğunu vurğulayıblar. USA TODAY-ın məlumatına görə, Morrou 25 yanvarda həbs edilib və Qərbi Virciniya ştatının Çarlston şəhərindəki Cənub Mərkəzi Regional Həbsxana və İslah Müəssisəsinə (SCRJ) aparılıb. Müəssisənin məlumatına görə, onun girov məbləği 75.000 dollar müəyyən edilib.
//Samir Qurbanov, Editor.az
