Amerika və Ukrayna danışıqları iştirakçıları Rusiya ilə Ukrayna arasında mart ayına qədər razılığa gəlmək kimi iddialı bir məqsədi müzakirə ediblər, baxmayaraq ki, bu son tarix əsas ərazi məsələsində razılığın olmaması səbəbindən gecikəcək.
Ölkə.az “reuters”ə istinadən xəbər verir ki, müzakirə olunan sxemə əsasən, istənilən razılaşma Ukrayna seçiciləri tərəfindən referenduma təqdim ediləcək və onlar eyni zamanda milli seçkilərdə iştirak edəcəklər.
Xüsusi nümayəndə Stiv Uitkoff və prezident Donald Trampın kürəkəni Cared Kuşnerin rəhbərlik etdiyi Amerika danışıqlar qrupu, Əbu-Dabi və Mayamidə keçirilən son görüşlərdə ukraynalı həmkarlarına bu səsvermənin mümkün qədər tez keçirilməsinin daha yaxşı olacağı barədə fikirlərini bildiriblər.
“Reuters”in məlumatına görə, Amerika və Ukrayna rəsmiləri may ayında seçkilərin və referendumun keçirilməsi imkanlarını müzakirə ediblər. Lakin danışıqlarla tanış olan bir neçə mənbə ABŞ-ın təklif etdiyi cədvəli qeyri-real adlandırıb.
Qeyd olunur ki, bu cür seçkilərin təşkili qanunvericilikdə dəyişikliklər tələb edəcək, çünki Ukraynada hərbi vəziyyət dövründə belə səsvermə qadağandır.
Nəşr əlavə edib ki, Kiyev ABŞ və onun tərəfdaşları tərəfindən Ukrayna üçün təhlükəsizlik zəmanətləri təmin edilənə qədər heç bir razılaşmaya getməyəcək.
ABŞ-ın vasitəçiliyi ilə keçirilən danışıqların ikinci raundu Əbu-Dabidə 314 hərbi əsir azadlığa buraxılması və müzakirələrin tezliklə bərpa olunması vədi ilə başa çatıb. Zelenski növbəti üçtərəfli görüşün tezliklə ABŞ-da keçirilə biləcəyini bildirib.
Mürtəza
