Moderator.az portalından verilən məlumata görə, ain.az xəbər yayır.
"Baş nazir Sanae Takaiçi Yaponiyanı daha sərt, daha müstəqil və daha iddialı qlobal gücə çevirmək niyyətindədir..."
Yaponiyanın baş naziri Sanae Takaiçi ölkənin onilliklərdir davam edən ehtiyatlı və özünü məhdudlaşdıran xarici siyasət xəttini kökündən dəyişmək istəyir.
Moderator.az xəbər verir ki, bu barədə "bloomberg.com" nəşri yazıb.
Millətçilikdən güc siyasətinə
Baş nazir hesab edir ki, Yaponiya İkinci Dünya müharibəsinin tarixi yükünü daşımaqdan və daim üzr istəyən mövqedə qalmaqdan imtina etməlidir. Takaiçinin fikrincə, beynəlxalq hörmət yalnız güc, qətiyyət və milli maraqların açıq müdafiəsi ilə qazanılır.
Məhz bu səbəbdən o, Yaponiya Silahlı Qüvvələrinin imkanlarının genişləndirilməsini, müdafiə xərclərinin ÜDM-in ən azı 2 faizi səviyyəsinə çatdırılmasını və ölkənin regionda daha aktiv hərbi-siyasi rol almasını zəruri sayır.
Çin, Tayvan və ABŞ amili
Baş nazir Tayvan məsələsini Yaponiyanın birbaşa milli təhlükəsizlik problemi kimi təqdim edir. Onun fikrincə, Tayvanın Çinin nəzarətinə keçməsi Yaponiyanın dəniz yollarını, enerji təhlükəsizliyini və regional balansı ciddi təhlükə altına salar. Bu yanaşma Pekində narahatlıqla qarşılanır və iki ölkə arasında ritorikanı daha da sərtləşdirir.
Eyni zamanda Takaiçi ABŞ-la strateji münasibətləri Yaponiya təhlükəsizliyinin əsas dayağı hesab edir. O, ABŞ prezidenti Donald Tramp ilə şəxsi və siyasi əlaqələrin möhkəmləndirilməsinə xüsusi önəm verir, Yaponiya-ABŞ hərbi alyansını isə dəyişməz sütun adlandırır. Analitiklər qeyd edirlər ki, bu kurs Yaponiyanı Vaşinqtonun Asiya-Sakit okean strategiyasında daha ön mövqeyə çıxarır.
Dövlət kapitalizmi və riskli iqtisadi manevrlər
Takaitinin iqtisadi baxışları da ənənəvi yapon modellərindən fərqlənir. O, dövləti böyük bir korporasiya kimi idarə etməyin tərəfdarıdır. Gənclik illərində Panasonic şirkətinin banisi Konosuke Matsușitanın ideyalarından təsirlənən baş nazir hesab edir ki, iqtisadi dirçəliş üçün dövlət aktiv investor rolunu oynamalıdır.
Süni intellekt, yarımkeçiricilər, müdafiə sənayesi və infrastruktur layihələri Takaiçinin əsas prioritetləridir. Bununla belə, yüksək dövlət borcu, zəifləyən yen və artan faiz xərcləri fonunda bu siyasət maliyyə bazarlarında narahatlıq yaradır. Baş nazir isə dəfələrlə vurğulayıb ki, Yaponiya Böyük Britaniyada Liz Trass dövründə yaşanan maliyyə xaosunu təkrarlamayacaq.
"Tək canavar" lider və cəmiyyətin reaksiyası
Siyasi elitanın klassik dairələrindən kənardan gələn Sanae Takaiçi özünü "adi ailədən çıxmış" lider kimi təqdim edir. Onun sərt intizamı, detallara hədsiz diqqəti və kompromislərə meylli olmaması ona "tək canavar" imici qazandırıb.
Buna baxmayaraq, xüsusilə gənclər və millətçi elektorat arasında populyarlığı sürətlə artır. Bəzi sorğularda ona dəstək səviyyəsi 80-90 faizə yaxınlaşır. Takaiçi özü bu dəstəyi belə izah edir: "Mən Yaponiyanın qorxulan yox, hörmət edilən dövlət olmasını istəyirəm".
Bu yanaşma Yaponiya cəmiyyətində ikili reaksiya doğurur: bir qism bunu təhlükəli radikallaşma sayır, digərləri isə məhz onilliklərdir çatışmayan liderlik modeli kimi görür. Qarşıdakı seçkilər isə Yaponiyanın bu yeni, sərt və iddialı yoluna cəmiyyətin nə dərəcədə hazır olduğunu göstərəcək.
Daha ətraflı məlumat və yeniliklər üçün ain.az saytını izləyin.
