Bir çox evdə yeməkdən sonra qida qalıqları mətbəx çanağında yuyularaq kanalizasiyaya ötürülür.
Pravda.az bildirir ki, bəzi məhsulların mətbəx çanağında yuyulması boruların qısa müddətdə tıxanmasına və ciddi texniki problemlərə səbəb ola bilər.
Bu məhsullar xüsusilə risklidir və mətbəx çanağında yuyulmamalıdır:
Yağlar (bitki və heyvan yağları)
İsti halda maye olan yağlar borularda soyuduqdan sonra sərtləşir və zamanla qalın tıxac yaradır. Bu isə suyun axınını tamamilə bağlaya bilər.
Qəhvə çöküntüsü
Qəhvə cövhəri su ilə yuyulduqda borunun dibinə çökür və digər qalıqlarla birləşərək tıxanmaya səbəb olur.
Yumurta qabıqları
Xırda görünsə də, yumurta qabıqları borularda toplanaraq axının zəifləməsinə və tıxacın yaranmasına gətirib çıxarır.
Düyü və makaron
Bu məhsullar su ilə təmasda şişir. Az miqdarda belə mətbəx çanağına atıldıqda boruların içində həcmi artaraq tıxanma yarada bilər.
Un
Un su ilə qarışdıqda xəmirə bənzər kütlə əmələ gətirir və kanalizasiya borularını asanlıqla bağlayır.
Qeyd: Bu cür qida qalıqları əvvəlcə süzgəcdən keçirilsin və daha sonra zibil qabına atılsın.
Əminə Bayramova
