Avropa İttifaqına üzv ölkələr rəqabət qabiliyyətinin qorunması məsələsində ümumi mövqedən çıxış edir. Son müzakirələr zamanı bildirilib ki, Brüsseldə qəbul edilən bəzi qərarlar sənaye sektoruna mənfi təsir göstərir və bu, xüsusilə emissiya kvotalarında özünü göstərir. Yüksək qiymətlər və spekulyativ mexanizmlər sənayenin inkişafını çətinləşdirir, bu isə qitə iqtisadiyyatının gələcəyi üçün risk yaradır.
Hafta.az xəbər verir ki, Aİ ölkələri üçün ən aktual problemlərdən biri enerji daşıyıcılarının bahalaşmasıdır.
Bu mövzu hazırda digər bütün məsələləri kölgədə qoyur və yaxın zamanda keçiriləcək qeyri-rəsmi Aİ sammitində əsas müzakirə mövzularından biri olacaq. Sammitdə Avropanın qlobal miqyasda rəqabət qabiliyyətinin gücləndirilməsi yolları axtarılacaq.
Eyni zamanda, üzv ölkələr qeyri-qanuni miqrasiyaya qarşı mübarizənin vacibliyi barədə razılığa gəlib. Vurğulanır ki, təhlükəsizlik məsələləri prioritet olmalı, qoruma statusunu itirmiş miqrantların geri qaytarılması mexanizmləri gücləndirilməlidir. Bu yanaşma Aİ daxilində həm sabitliyin, həm də sosial balansın qorunmasına yönəlib.
