ABŞ Maliyyə Nazirliyi Venesuela nefti ilə bağlı əməliyyatlara dair yeni lisenziya verib.
ABŞ Maliyyə Nazirliyi Venesuela nefti ilə bağlı müəyyən əməliyyatlara icazə verən yeni lisenziya yayımlayıb. Sənəd bəzi enerji sövdələşmələrinə yaşıl işıq yandırsa da, bir sıra ciddi məhdudiyyətlər tətbiq edir.
KONKRET.az xəbər verir ki, yeni qaydalara əsasən, Rusiya, İran, Şimali Koreya (KXDR) və Kuba ilə əlaqəli hər hansı fiziki və ya hüquqi şəxslərin iştirak etdiyi tranzaksiyalar qadağan olunur.
Bu ölkələrlə birbaşa və ya dolayı maliyyə və kommersiya əlaqələri lisenziya çərçivəsində icazəli hesab edilmir.
Bundan əlavə, sənəd Venesuela və ya ABŞ-da fəaliyyət göstərən, lakin birbaşa və ya dolayı yolla Çin vətəndaşları və ya Çin təşkilatları tərəfindən nəzarət edilən şirkətlərlə iş aparılmasını da məhdudlaşdırır. Bu məqam Vaşinqtonun enerji sektorunda geosiyasi təsirləri azaltmaq cəhdinin bir hissəsi kimi qiymətləndirilir.
Rəsmi açıqlamada bildirilir ki, lisenziyanın məqsədi qlobal enerji bazarlarında sabitliyi qorumaq, eyni zamanda sanksiya rejimlərinin pozulmasının qarşısını almaqdır. ABŞ administrasiyası Venesuela ilə bağlı siyasətdə selektiv yumşalma siqnalları versə də, strateji rəqiblərlə əlaqəli strukturlara qarşı sərt mövqeyini saxlayır.
Ekspertlərin fikrincə, yeni mexanizm beynəlxalq enerji şirkətləri üçün məhdud, lakin hüquqi baxımdan daha aydın çərçivə yaradır. Bununla belə, çoxsaylı istisnalar və nəzarət tələbləri əməliyyatların praktik icrasını çətinləşdirə bilər.
Müşviq Tofiqoğlu
KONKRET.az
