ain.az xəbər verir, Azertag saytına əsaslanaraq.
Buxarest, 11 fevral, AZƏRTAC
Qara dəniz hövzəsində formalaşan yeni geosiyasi və geoiqtisadi reallıqlar fonunda Rumıniya Avropanın enerji və nəqliyyat təhlükəsizliyində mühüm rol oynamağa başlayır. Region ölkələri arasında razılaşdırılan və “Şaquli koridor” kimi tanınan yeni təşəbbüs Yunanıstan, Bolqarıstan və Rumıniyanı birləşdirərək Egey dənizi ilə Qara dəniz arasında alternativ enerji və logistika xəttinin formalaşdırılmasını nəzərdə tutur.
AZƏRTAC xəbər verir ki, sözügedən koridor enerji resurslarının və nəqliyyat axınlarının şaxələndirilməsi məqsədi daşıyır.
Layihə çərçivəsində maye təbii qazın, elektrik enerjisinin və digər strateji resursların Cənub-Şərqi Avropaya daha təhlükəsiz və davamlı marşrutlarla çatdırılması planlaşdırılır. Bu istiqamətdə Rumıniya Qara dəniz sahilində yerləşən limanları və mövcud infrastruktur imkanları hesabına əsas tranzit mərkəzlərdən birinə çevrilir.
“Şaquli koridor” təşəbbüsü yalnız enerji sahəsi ilə məhdudlaşmır. Layihə avtomobil və dəmir yolu xətlərinin modernləşdirilməsini, liman-logistika infrastrukturlarının inteqrasiyasını və regiondaxili ticarət əlaqələrinin sürətləndirilməsini də əhatə edir. Bu isə Qara dəniz regionunun Avropa bazarlarına daha sıx bağlanmasına və nəqliyyat xərclərinin azalmasına imkan yaradır.
Analitiklərin fikrincə, Rumıniyanın bu layihədə fəal iştirakı ölkənin geostrateji mövqeyini əhəmiyyətli dərəcədə gücləndirir. Avropa İttifaqının enerji təhlükəsizliyi siyasətində şərq marşrutlarından asılılığın azaldılması əsas prioritetlərdən biri hesab olunur və Şaquli koridor bu məqsədə xidmət edən əsas alətlərdən biri kimi dəyərləndirilir. Eyni zamanda təşəbbüs NATO çərçivəsində hərbi-logistika imkanlarının artırılması baxımından da strateji əhəmiyyət daşıyır.
Qeyd olunur ki, yeni koridor Rumıniyanın regionda enerji tranziti və nəqliyyat logistikasında aparıcı ölkə kimi mövqeyini möhkəmləndirməklə yanaşı, Qara dənizi Egey və Aralıq dənizi hövzələri ilə birləşdirən mühüm geoiqtisadi xəttin formalaşmasına zəmin yaradır. Bu proses Cənub-Şərqi Avropada iqtisadi inteqrasiyanın dərinləşməsinə və uzunmüddətli sabitliyə töhfə verən əsas amillərdən biri kimi qiymətləndirilir.
İqbal Hacıyev
AZƏRTAC-ın xüsusi müxbiri
Buxarest
Sonrakı hadisələr barədə daha çox məlumat almaq üçün ain.az saytını izləyin.
