Ukraynanın enerji infrastrukturuna dəyən son zədələr nəticəsində elektrik enerjisi istehsalı potensialı 10 QVt azalıb ki, bu da hazırda pik saatlarda gündəlik 5-6 QVt səviyyəsində ciddi defisitin yaranmasına səbəb olur.
AFN.az "Bloomberg"ə istinadən xəbər verir ki, bunu Ukrayna prezidenti Volodimir Zelenski deyib. Müharibədən əvvəl Ukrayna enerji sisteminin ümumi gücü təxminən 56 QVt təşkil edirdi və ölkə hətta xaricə elektrik enerjisi ixrac edirdi, lakin hazırda mövcud güclərin təxminən 70 faizi, yəni 39-41 QVt-ı itirilib.
Zelenski agentliyə müsahibəsində vurğulayıb ki, zədələnmiş obyektlərin bəzilərini növbəti istilik mövsümünə qədər bərpa etmək texniki cəhətdən mümkün deyil, çünki ölkə daxilində təmir üçün lazım olan ehtiyat hissələri və avadanlıq ehtiyatı çətinliyi var. Hazırda Ukraynanın bütün regionlarında istehlakçılar gün ərzində 8 saatdan 16 saata qədər davam edən məcburi və ya qəza kəsintiləri ilə üzləşirlər, çünki sistemin real imkanları orta hesabla 11 QVt-dan bir qədər çox olduğu halda, real tələbat 18 QVt-ı keçir.
Vəziyyətin kritikliyini nəzərə alaraq Ukrayna rəhbərliyi beynəlxalq tərəfdaşlarından təcili olaraq transformatorlar, generatorlar və enerji sistemini qorumaq üçün əlavə hava hücumundan müdafiə vasitələri tələb edir, eyni zamanda Avropa İttifaqı ölkələrindən idxal həcminin artırılması üçün texniki infrastrukturun genişləndirilməsi üzərində işləyir.
