İndoneziya ölkə boyu pullu yolları hərbi təyyarələr üçün fövqəladə vəziyyət zolaqlarına çevirmək planını icra etməyə başlayır. Bu strategiya ilə nəhəng arxipelaqdan ibarət olan ölkədə magistral yolların azməsrəfli "təyyarədaşıyan gəmi" funksiyasını yerinə yetirməsi hədəflənir.
İndoneziya Hərbi Hava Qüvvələrinin komandanı, marşal Tonni Harcono bəyan edib ki, ölkənin 39 əyalətinin hər birində ən azı bir magistral yol hissəsinin fövqəladə eniş zolağı kimi istifadəyə yararlı vəziyyətə gətirilməsi nəzərdə tutulur.
Lampunq əyalətində keçirilən təlim zamanı bir F-16 qırıcısı və bir Super Tucano hücum təyyarəsi magistral yola uğurlu eniş və uçuş icra edərək bu imkanı nümayiş etdiriblər. Müdafiə nazirinin müavini Donni Ermavan Taufanto bu nailiyyətin ölkənin müdafiə sisteminin gücləndirilməsi yolunda mühüm dönüş nöqtəsi olduğunu qeyd edir.
Maliyyə və strateji üstünlüklər
Avtomobil yollarının hərbi məqsədlər üçün istifadəsi yeni konsepsiya olmasa da, 6 mindən çox yaşayış məntəqəsinin adalara səpələndiyi İndoneziya üçün bu, xüsusi strateji əhəmiyyət kəsb edir. Ekspertlər vurğulayırlar ki, milyardlarla dollar dəyərində olan təyyarədaşıyan gəmilər almaq və onlara texniki qulluq göstərməkdənsə, magistral yollardan istifadə etmək həm daha iqtisadi, həm də daha təhlükəsizdir.
Bildirilir ki, tək bir təyyarədaşıyan gəmi vurulduğu təqdirdə bütün əməliyyat potensialı itirildiyi halda, çoxsaylı yol zolaqlarından birinin sıradan çıxması ümumi döyüş qabiliyyətinə ciddi xələl gətirmir.
Pilotlar üçün çətin sınaq
Hərbi Hava Qüvvələrinin komandanı Harcono plan çərçivəsində magistral yolların təxminən 3 min metrlik hissələrinin hərbi təyyarələrin istifadəsinə ayrılacağını duyurub. Pilotların məharətini yüksək qiymətləndirən rəsmi şəxslər diqqəti bir məqama çəkirlər: standart hava limanı zolağının eni 45-60 metr olduğu halda, magistral yolların eni cəmi 24 metrdir.
Riskli olmasına baxmayaraq, hərbi hava qüvvələri pilotlarının məhz bu cür dar sahələrə eniş edə bilmələri üçün xüsusi təlim keçdikləri bildirilir.
