Nərimanov Rayon Məhkəməsində qəsdən sağlamlığa yüngül zərər vurmada təqsirləndirilən Bağır Pənahovun (adı, soyadı şərtidir) cinayət işi üzrə məhkəmə istintaqı yekunlaşıb.
Pravda.az-ın əldə etdiyi məlumata görə, hakim Tural Musayevin sədrliyi ilə keçirilən prosesdə qərar elan edilib.
Məhkəmənin qərarı ilə böyük ictimai təhlükə törətməyən bu cinayət əməli üzrə aparılan sadələşdirilmiş icraata xitam verilib və o, cinayət məsuliyyətindən azad edilib.
Qeyd: Hadisə cari ilin 10 yanvar tarixində, saat 20:00 radələrində Bakı şəhəri, Nərimanov rayonu ərazisində baş verib.
İstintaqla müəyyən edilib ki, Bağır Pənahov sərxoş vəziyyətdə bacısı, zərərçəkmiş Cəmilə Pənahova (adı, soyadı şərtidir) ilə yaşadığı ünvanda mübahisə edib. Mübahisə zamanı o, qəsdən yumruqla bacısının baş nahiyəsinə zərbə endirib.
Tibbi ekspertizanın rəyinə əsasən, zərbə nəticəsində zərərçəkmiş şəxsin ənsə nahiyəsində yumşaq toxumaların əzilməsi və hematoma (şişkinlik) aşkar edilib. Bu xəsarətlər sağlamlığın qısa müddətə pozulmasına səbəb olan yüngül bədən xəsarəti kimi tövsif edilib.
Bağır Pənahovun barəsində Cinayət Məcəlləsinin 128-ci (qəsdən sağlamlığa yüngül zərər vurma) maddəsi ilə ittiham irəli sürülüb.
Məhkəmənin hazırlıq iclasında təqsirləndirilən şəxs əməlini etiraf edərək bacısı ilə barışdığını, vurduğu ziyanı tam ödədiyini bildirib və işin xitam olunmasını xahiş edib.
Zərərçəkmiş şəxs də öz növbəsində məhkəməyə ərizə təqdim edərək qardaşı ilə barışdığını, dəymiş ziyanın tam ödənildiyini, heç bir şikayət və tələbinin olmadığını təsdiqləyib.
Xatırlatma: Bağır Pənahov əvvəllər (2013-cü ildə) Rusiya Federasiyasında cinayət məsuliyyətinə cəlb olunub, məhkumluq həyatı yaşayıb.
Kamal Məmmədov
