Rusiyada sosial şəbəkələrin fəaliyyətini məhdudlaşdırmaq və cəmiyyətə öz alternativlərini təklif etməklə bir neçə məqsəd güdülür...
Poliqon xəbər verir ki, bu fikri Ukrayna Silahlı Qüvvələrinin Quru Qoşunlarının Ehtiyatçılar Şurasının rəhbəri İvan Tımoçko səsləndirib.
"Onlar çox yaxşı anlayırlar ki, Telegram, WhatsApp kimi şəbəkələrdə etiraz əhval-ruhiyyəli bir çox Rusiya vətəndaşı müəyyən qruplar yaradıb, aşkarlanma riskini azaltmaq üçün öz şəbəkələrini qurublar", deyə o, UNİAN agentliyinə müsahibəsində bildirib.
Bundan əlavə, Rusiyada kütləvi səfərbərlik baş verərsə, güc strukturları ehtimal ki, hərbi hissələrdə və təlim mərkəzlərində sosial şəbəkələrdən istifadəni də məhdudlaşdıracaqlar:
"Bu, çağırılanların bir-biri ilə koordinasiya etməsinin və xarici dünya ilə, o cümlədən əsir düşmək üçün nəzərdə tutulmuş Ukrayna təşəbbüsləri ilə əlaqə saxlamasının qarşısını almaq üçün ediləcək".
Lakin Tımoçkonun fikrincə, Rusiyanın FSB qurumu daha hiyləgərlik edib və daha uzağa gedib. Belə ki, "zəhərli Qərb" sosial şəbəkələrinin əvəzinə ruslara yerli alternativlər təklif olunur:
"Hətta keçmiş etiraz icmaları bu platformalarda koordinasiyanı bərpa etməyə çalışsalar belə, onların fəaliyyəti xüsusi xidmət orqanları üçün xeyli daha şəffaf olacaq. Yəni FSB məhz etirazçı vətəndaşları müəyyən etmək və davranışlarını təhlil etmək üçün əlavə imkanlar əldə edəcək".
Bu isə düşmənin kifayət qədər ciddi strateji yanaşmasıdır. Belə səylərin məqsədi, ehtimal ki, Avropa ölkələrinə qarşı mümkün müharibəyə hazırlıqdır:
"İnformasiya sızmalarını minimuma endirmək, Rusiya cəmiyyətini "ətrafımız düşmənlərlə doludur, biz mühasirəyə alınmış qaladayıq və onlara qarşı müharibəyə getməliyik" düşüncəsinə kökləmək üçün. Həm də cəmiyyətdə real gündəlik dəyişiklikləri izləmək üçün. Bu sadəcə "biz qapanırıq" və ya "biz müəyyən sosial şəbəkələrdən imtina edəcək qədər sadəlövhük" demək deyil. Xeyr, onlar dərhal öz platformalarını məcburən tətbiq edirlər. Bu, planlı, sistemli, hesablanmış və çoxdan hazırlanmış işdir. Bu, ciddi çağırışdır".
Fevralın 10-da bir sıra Rusiya KİV-ləri Roskomnadzor qurumunun Telegram messencerinin fəaliyyətinin qismən məhdudlaşdırılması ilə bağlı tədbirlər görməyi planlaşdırdığını bildirib. Bəzi mənbələr bu tədbirlərin artıq həyata keçirildiyini də qeyd edib.
Telegram-ın qurucusu Pavel Durov messencerin bloklanmasını şərh edərkən Kremlin addımlarını səkkiz il əvvəl İranda baş verən hadisələrlə müqayisə edib. Hakimiyyətin səylərinə baxmayaraq, ölkə sakinləri sosial şəbəkədən istifadəni davam etdirirlər.
Daha sonra məlum olub ki, Rusiya WhatsApp xidmətini tam bloklamağa cəhd edib. Meta şirkəti RF-nin 100 milyondan çox istifadəçini təcrid etməyə və onları dövlətə məxsus Max tətbiqinə keçirməyə çalışdığını bildirib.
Poliqon.info
