Türkiyə Böyük Millət Məclisinin (TBMM) xarici əlaqələr Komitəsinin nümayəndə heyəti prezidentlər Rəcəb Tayyib Ərdoğan və Donald Tramp arasında müsbət dialoq şəraitində parlamentlərarası əlaqələri gücləndirmək üçün ABŞ Konqresində çoxsaylı görüş keçirib. Suriya, Ukrayna və Cənubi Qafqazdakı vəziyyət də daxil olmaqla regional məsələlər amerikalı qanunvericilərin gündəliyində olub.
Bu barədə AZƏRTAC-a TBMM xarici əlaqələr Komitəsinin rəhbəri Fuat Oktay məlumat verib.
Onun sözlərinə görə, Ermənistan ilə Azərbaycan arasındakı Zəngəzur dəhlizi və əlbəttə, Rusiya ilə Ukrayna arasındakı mövcud vəziyyət müzakirə olunan mövzular arasında olub.
Türkiyə ilə ABŞ arasında ikitərəfli münasibətlərə gəldikdə, Türkiyəli deputat müdafiə sektorunda Vaşinqton ilə fəal əlaqələri, xüsusən də Ankaranın beşinci nəsil KAAN təyyarələri üçün mühərrik məsələsini həll etmək səylərini vurğulayıb.
F. Oktay CAATSA sanksiyalarının ləğvi məsələsi də daxil olmaqla, Ankara ilə Vaşinqton arasında bütün problemli məsələlərin tezliklə həll olunacağına ümid etdiyini bildirib.
