Türkiyə və Ermənistan arasında birbaşa quru yolu ilə ticarətin bərpası ilə bağlı razılıq əldə olunub.
KONKRET.az xəbər verir ki, bu barədə Türkiyənin T24 nəşri məlumat yayıb.
Al Monitor jurnalisti Ezgi Aki iki kommersiya mənbəyə istinadən bildirib ki, yeni razılaşmaya əsasən, yüklər daşınma marşrutu boyunca öz ilkin ixrac statusunu qoruyub saxlayacaq.
Məlumata görə, tərəflər bu addımı münasibətlərin normallaşdırılması prosesi çərçivəsində atıblar. Qeyd olunur ki, ölkələr arasında birbaşa yük hava daşımaları artıq fəaliyyət göstərir.
Türkiyə-Ermənistan biznesinin inkişafı üzrə İcra Şurası sədrinin müavini Noyan Soyakın sözlərinə görə, “qərar bir müddət əvvəl qəbul edilib və texniki işlər artıq aparılırdı”. O, həmçinin vurğulayıb ki, yeni mexanizm türk şirkətlərinin əlavə xərclərini 10–15 faiz azaltmağa imkan verəcək.
Xatırladaq ki, əvvəllər iki ölkə arasında yük daşımaları Gürcüstandakı vasitəçilər üzərindən həyata keçirilir və “re-ixrac” kimi qiymətləndirilirdi.
Natiq Səlim,
KONKRET.az
