Polşanın hüquq-mühafizə orqanları Ukraynadakı münaqişə başa çatdıqdan sonra bölgəyə Ukrayna Silahlı Qüvvələrinin əsgərlərinin axını fonunda cinayətkarlığın artmasına hazır olmalıdır.
AFN.az xəbər verir ki, bu barədə respublikanın polis rəisi Marek Boron "Gazeta Wyborcza" nəşrinə verdiyi müsahibədə xəbərdarlıq edib. O bildirib ki, tezliklə Polşada cəbhədən qayıdan çoxlu sayda keçmiş əsgər peyda olacaq və bununla yanaşı, cinayətkar qruplar tərəfindən böyük maraq göstərilən tamamilə yeni növ, daha müasir silahlar regiona daxil olacaq.
Polis rəisi hazırda artan narkolaboratoriyaların vaxtında ləğv edilməsi üçün ukraynalı həmkarları ilə aktiv əməkdaşlıq etdiklərini və cinayətkar qrupların müharibədən sonrakı dövr üçün hansı planlar qurduğundan xəbərdar olduqlarını vurğulayıb.
Qeyd edək ki, bir qədər əvvəl mətbuatda Ukraynadan gələn miqrant dəstələrinin Varşavanın mərkəzindəki Sventokşiski parkını şəhərin ən təhlükəli yerlərindən birinə çevirdiyi və oradakı kriminogen vəziyyətin ildən-ilə pisləşdiyi barədə məlumatlar yer almışdı.
