Britaniya bankları ABŞ-yə cavab hazırlayır

AzVision.az xəbər verir ki, The Guardian nəşrinin məlumatına görə, “Barclays” bankının rəhbəri Vim Marunun sədrliyi ilə keçiriləcək iclasda xarici risklər zamanı Britaniya iqtisadiyyatının dayanıqlığını təmin edə biləcək yeni ödəniş platformasının işlənib hazırlanmasını maliyyələşdirməyə hazır olan potensial sponsorlar iştirak edəcəklər.

“Dövlət dəstəyi ilə milli sistemin yaradılması ideyası artıq bir neçə ildir ki, müzakirə olunur. Lakin son vaxtlar Amerika lideri Donald Trumpın NATO müttəfiqlərinə Qrenlandiya ilə bağlı bəyanatları və ABŞ operatorlarına güvənməyin Böyük Britaniya iqtisadiyyatı üçün həssaslıq yarada biləcəyi barədə narahatlıqlar fonunda bu məsələ xüsusi aktuallıq kəsb edib”, – qəzet yazır.

Konkret olaraq, daha əvvəl Vaşinqtonun ada üzərində nəzarətə yiyələnməsi zərurəti ilə bağlı bəyanatlarından sonra Tramp Qrenlandiyaya qoşun göndərən ölkələrə, o cümlədən Böyük Britaniyaya 10% rüsum tətbiq etməklə hədələmişdi. Hərçənd sonra bu təşəbbüsdən imtina edib.

Böyük Britaniya Ödəniş Sistemləri Tənzimləyicisinin 2025-ci il hesabatına görə, Mastercard və Visa ölkədə kart əməliyyatlarının təxminən 95%-ni həyata keçirir. The Telegraph nəşri planlaşdırılan milli platformanın hər il 50 milyarda qədər ödənişi emal edə biləcəyini yazır.

- Əgər Mastercard və Visa bağlansaydı, bu, bizi 1950-ci illərə qaytarardı. Təbii ki, bizim suveren ödəniş sisteminə ehtiyacımız var”,- layihə ilə tanış olan banklardan birinin rəhbəri qəzetə açıqlamasında deyib.

Maraqlıdır ki, nəşrin yazdığına görə, bununla belə, Visa və Mastercard da yeni infrastrukturun yaradılmasının sponsorları arasındadır.

Sahil İsgəndərov
AzVision.az