Abşeron Rayon Məhkəməsində qəsdən sağlamlığa yüngül zərər vurmada təqsirləndirilən Pənah Rəsulovun (adı, soyadı şərtidir) cinayət işi üzrə məhkəmə istintaqı yekunlaşıb.
Pravda.az-ın əldə etdiyi məlumata görə, hakim Abusət Qasımovun sədrliyi ilə keçirilən prosesdə hökm oxunub.
Məhkəmənin hökmü ilə onun cinayət əməlini törətməsinə dair məhkəməyədək sadələşdirilmiş icraat materialına xitam verilib və təqsirləndirilən şəxs cinayət məsuliyyətindən azad edilib. Pənah Rəsulovun barəsində “qətimkan tədbiri” seçilməməsi nəzərə alınıb.
İttihama görə, hadisə 10 yanvar 2026-cı il tarixdə gecə saat 23 radələrində Abşeron rayonu, Saray qəsəbəsində yerləşən fərdi yaşayış evində baş verib. Təqsirləndirilən şəxs alkoqol sərxoşluğu vəziyyətində yaşadığı ünvana gəlib.
Materiallara əsasən, həmin evdə onunla birlikdə yaşayan arvadı, zərərçəkmiş Mədinə Rəsulova (adı, soyadı şərtidir) ərinə sərxoş vəziyyətdə evə gəlməsi ilə bağlı irad bildirib. Bu səbəbdən tərəflər arasında ailə-məişət münasibətləri zəminində mübahisə yaranıb. Mübahisə zamanı Pənah Rəsulov arvadının üzərinə hücum edərək qəsdən əl və yumruq zərbələri ilə onun göz, sifət, baş, sinə, qol və bədəninin müxtəlif nahiyələrinə ardıcıl zərbələr endirib.
Məhkəmə-tibbi ekspertizasının rəyinə əsasən, Mədinəyə sağ gözün ağlı qişasına qansızma ilə müşayiət olunan, sağ göz yarığının daralmasına səbəb olan sağ gözün üst və alt göz qapaqlarının qançır-şişkinliyi, döş qəfəsi və sol bazu nahiyələrində qançırlar, başın sol gicgah nahiyəsində sıyrıq xəsarətləri yetirilib. Həmin xəsarətlər dərəcəsinə görə ümumilikdə sağlamlığın qısa müddətə pozulmasına səbəb olan yüngül zərər kimi qiymətləndirilib.
Beləliklə, Pənah Rəsulovun hərəkətləri nəticəsində zərərçəkmiş şəxsin sağlamlığına qəsdən yüngül zərər vurulduğu müəyyən edilib.
Mədinə Rəsulova məhkəməyə təqdim etdiyi ərizədən görünür ki, cinayət qanunu ilə nəzərdə tutulan əməli törətmiş təqsirləndirilən şəxs tərəfindən ona dəymiş ziyanın ödənilməsini qeyd edərək, sonuncu ilə barışmasını, ona qarşı heç bir şikayət və tələbinin olmamasını və barəsində olan məhkəməyədək sadələşdirilmiş icraat materialına xitam verilməsini xahiş edib.
Kamal Məmmədov
