Avropa İttifaqı (Aİ) Komissiyası Rusiya-Belarus-Ukrayna sərhədindəki şərq bölgələrinin təhlükəsizlik və iqtisadi baxımdan gücləndirilməsi üçün infrastruktur, enerji, nəqliyyat, məşğulluq və investisiyaları əhatə edən yeni dəstək planına başladığını elan edib.
Aİ Komissiyasından verilən açıqlamada Birliyin şərq bölgələrinin gücləndirilməsinin müharibənin fəsadlarını azaltmaq baxımından böyük əhəmiyyət kəsb etdiyi bildirilib. Bunun eyni zamanda Avropanın təhlükəsizliyi və iqtisadi rəqabət qabiliyyəti üçün strateji bir investisiya xarakteri daşıdığı vurğulanıb.
Sənəddə Finlandiya, Estoniya, Latviya, Litva, Polşa, Slovakiya, Macarıstan, Rumıniya və Bolqarıstandakı bəzi sərhəd bölgələrinin təhlükəsizlik riskləri, qeyri-qanuni miqrasiya təzyiqi və ticarətin pozulması kimi problemlərdən daha çox təsirləndiyi qeyd edilib.
Yeni strategiya beş əsas sahəyə diqqət yetirir: təhlükəsizlik və dözümlülük, iqtisadi artım, yerli sənaye və enerji layihələri, nəqliyyat və rəqəmsal əlaqələr, həmçinin təhsil və məşğulluq.
Plan çərçivəsində maliyyəyə çıxışı asanlaşdıracaq "EastInvest" adlı yeni investisiya mexanizminin yaradılması nəzərdə tutulur. Bundan əlavə, aşağıdakı addımların atılması planlaşdırılır:
Nəqliyyat infrastrukturunun təkmilləşdirilməsi;Baltikyanı ölkələrin elektrik sistemlərinin Avropa şəbəkəsinə qoşulması;İşçi qüvvəsi bazarını dəstəkləyəcək xüsusi proqramlar.
Aİ Komissiyası bu işlərin gedişatını qiymətləndirmək üçün hər il yüksək səviyyəli siyasi dialoq iclasları keçirəcək. İlk iclasın 26 fevral 2026-cı il tarixində keçirilməsi və "EastInvest" mexanizminin rəsmən fəaliyyətə başlaması gözlənilir.
