Azərbaycan Dövlət Aqrar Universitetində (ADAU) Qərbi Azərbaycan İcmasının (QAİ) Gəncə nümayəndəliyinin təşkilatçılığı ilə “Qərbi Azərbaycana qayıdış – Tarixi yaddaş və müasir reallıqlar” mövzusunda elmi-nəzəri konfrans keçirilib.
"Unikal" xəbər verir ki, tədbirdə torpaqlarımızın bütövlüyü uğrunda canlarından keçən şəhidlərin əziz xatirəsi bir dəqiqəlik sükutla yad edilib, sonra Dövlət Himni səsləndirilib.
Çıxış edən ADAU-nun rektoru, Qərbi Azərbaycan İcmasının Gəncə şəhəri üzrə nümayəndəsi Zəfər Qurbanov tədbir iştirakçılarını salamlayaraq qeyd edib ki, universitetdə çoxşaxəli elmi fəaliyyətlə yanaşı, tarixi yaddaşın qorunması və milli dəyərlərin təbliği də əsas prioritetlərdəndir. Rektor bu cür elmi tədbirlərin gənc nəslin milli kimlik və vətənpərvərlik ruhunda formalaşmasında mühüm rol oynadığını bildirib. O, cənab Prezident İlham Əliyevin rəhbərliyi ilə Qarabağ həsrətinə son qoyulduğunu, Azərbaycanın tarixinə qələbə səhifələrinin yazıldığını vurğulayıb və ölkəmizin davamlı inkişaf yolunda inamla irəlilədiyini diqqətə çatdırıb.
Zəfər Qurbanov “Qərbi Azərbaycana qayıdış – Tarixi yaddaş və müasir reallıqlar” mövzusunda keçirilən elmi-nəzəri konfransın böyük ictimai və elmi əhəmiyyət daşıdığını qeyd edərək, tədbirin iştirakçılarına uğurlar arzulayıb.
Konfrans çərçivəsində “Qərbi Azərbaycana Qayıdış” mövzusuna həsr olunan videoçarx nümayiş etdirilib.
Daha sonra çıxış edən Yeni Azərbaycan Partiyası Gəncə şəhər təşkilatının sədri Bayram Aslanov tədbirin yüksək səviyyədə təşkilinə görə təşəkkür edib, Qərbi Azərbaycanla bağlı tarixi həqiqətlərin bərpasının və beynəlxalq ictimaiyyətə çatdırılmasının vacibliyini vurğulayıb.
Azərbaycan Milli Elmlər Akademiyasının Gəncə Bölməsi Diyarşünaslıq İnstitutunun Tarix şöbəsinin müdiri Nərgiz Rəsulova Qərbi Azərbaycanın tarixi coğrafiyasının formalaşması və bu irsin müasir siyasi kursda əks olunması məsələlərinə toxunub, mövzunun elmi əhəmiyyətini diqqətə çatdırıb.
Konfransda çıxış edən Gəncə Dövlət Universitetinin Sosial fənlər kafedrasının müdiri Cavid Bağırzadə İrəvan quberniyasında ermənilər tərəfindən törədilmiş deportasiya və soyqırımı faktlarından bəhs edib.
Daha sonra ADAU-nun Epizootologiya, mikrobiologiya və parazitologiya kafedrasının müdiri Zahir Ələsgərov, Ümumi əkinçilik, genetika və seleksiya kafedrasının müdiri Aynur Həsənova çıxış edərək Qərbi Azərbaycan mövzusunun elmi əsaslarla araşdırılmasının, tarixi həqiqətlərin sistemli şəkildə öyrənilməsinin və gənc nəslə düzgün çatdırılmasının vacibliyini qeyd ediblər.
İctimai fənlər kafedrasının müdiri Elgün Aslanov tədbirin təşkilində əməyi olan hər kəsə təşəkkür edib. O, konfransın milli yaddaşın qorunması, elmi müzakirələrin genişləndirilməsi və hüquqi-siyasi mövqeyimizin möhkəmləndirilməsi baxımından mühüm əhəmiyyət daşıdığını bildirib.
İctimai fənlər kafedrasının dosenti Əbdürəhman Kazımov çıxış edərək, Qərbi Azərbaycana qayıdış məsələsinin beynəlxalq hüquq normaları və regional proseslər kontekstində əhəmiyyətindən bəhs edib, bu istiqamətdə aparılan elmi araşdırmaların vacibliyini xüsusi olaraq qeyd edib.
- Ночной Режим
- Домашняя страница
- Статистика
- Источники
- Рейтинг
- Погода
- Валюта
