Ermənistan Polşa ilə hərbi-texniki əməkdaşlıq müqaviləsi imzalayacaq » AzadMedia.az

Ermənistan Müdafiə Nazirliyi Polşanın Milli Müdafiə Nazirliyi ilə hərbi-texniki əməkdaşlıq müqaviləsi imzalayacaq. Bu barədə qərar Ermənistan hökumətinin Nazirlər Kabinetinin cümə axşamı keçirilən iclasında qəbul edilib.

“Sazişin imzalanması əməkdaşlıq gündəliyini tamamlayacaq, iki müdafiə nazirliyi arasında sıx əməkdaşlığa zəmin yaradacaq, həmçinin ikitərəfli əməkdaşlığın gündəliyini irəli aparacaq”, - deyə yuxarıda qeyd olunan qərarın izahatında bildirilir.

Saziş, həmçinin, iki tərəf arasında texniki-hərbi sahədə əməkdaşlığın əsas prinsip və prosedurlarını müəyyən etmək məqsədi daşıyır, ona əsasən onlar bərabərlik, qarşılıqlı hörmət və qarşılıqlı fayda prinsipləri əsasında əməkdaşlıq edəcəklər.

Əlavə edilir ki, Ermənistan və Polşa arasında müdafiə sahəsində əməkdaşlığın hüquqi əsasını 2004-cü il sentyabrın 6-da Varşavada Ermənistan və Polşa hökumətləri arasında imzalanmış müdafiə sektorunda əməkdaşlıq haqqında saziş təşkil edir.