Katteqat boğazında saxlanılan konteyner gəmisi bir neçə ay əvvəl adını dəyişib və sanksiyalar siyahısına daxil edilib...
Danimarka hakimiyyəti Katteqat boğazında İran bayrağı altında üzən “Nora” adlı konteyner gəmisini saxlayıb.
Poliqon xəbər verir ki, bu barədə Danimarkanın Dəniz İdarəsi məlumat yayıb. Bildirilir ki, gəmi fevralın 18-də Komor adaları bayrağını İran bayrağı ilə əvəz edib. Bir neçə ay əvvəl isə gəminin adı dəyişdirilib, əvvəlki adı “Cerus” olub.
Məlumata görə, konteyner gəmisi ABŞ Maliyyə Nazirliyinin İrana qarşı tətbiq etdiyi sanksiyalar siyahısına daxildir. Marine Traffic izləmə sisteminin məlumatına əsasən, gəmi Sankt-Peterburqdan hərəkət edib.
Yanvarın 13-də gəmi Danimarkanın Skagen bölgəsi yaxınlığından keçərək Sankt-Peterburqa istiqamətlənib və bu müddətdə geolokasiya məlumatlarının ötürülməsini dayandırıb. Mövqe məlumatları yanvarın 16-da, gəmi Baltik dənizi ilə hərəkət edərkən yenidən görünməyə başlayıb. Yanvarın 22-də konteyner gəmi Skagenin şimal hissəsinə çatıb, daha sonra Katteqat boğazına yönəlib və burada 25 gün ərzində lövbərdə qalıb.
Danimarka tərəfinin versiyasına görə, gəminin qeydiyyatı düzgün aparılmayıb. Komor adaları Danimarka Dəniz İdarəsinə bildirib ki, sözügedən gəmi onların reyestrində qeydiyyatda deyil. Bu barədə məlumat yerli TV2 telekanalına istinadla açıqlanıb.
Rəsmi açıqlamada qeyd olunur ki, konteyner gəmi qeydiyyat sertifikatları təqdim olunana qədər saxlanılacaq. Hadisə beynəlxalq sanksiyalar rejiminin icrası və dəniz nəqliyyatında şəffaflıq məsələlərini yenidən gündəmə gətirib.
Poliqon.info
