Ukraynada Rusiya ilə əlaqəli sui-qəsd şəbəkəsi ifşa edilib. Ukrayna Təhlükəsizlik Xidməti (SBU) Moldova və Ukraynada Rusiyanın əmri ilə yüksək vəzifəli Ukrayna rəsmilərinə qarşı sui-qəsd planlaşdıran 10 nəfərin həbs olunduğunu açıqlayıb.
"Enigma 2.0" kod adlı əməliyyat Moldova və Ukrayna təhlükəsizlik qüvvələri tərəfindən birgə həyata keçirilib. Şübhəlilərin hədəf siyahısına jurnalistlər, vətəndaş fəalları və hərbi kəşfiyyat (HUR) əməkdaşları daxil olub.
Baş prokuror Ruslan Kravçenko bildirib ki, sui-qəsd planlarının əsas hədəflərindən biri SBU direktoru Andrii Yusov olub.
İstintaq nəticəsində cinayətkar təşkilatın 34 yaşlı lideri tutulub. Onunla təmasda olan bir neçə cinayətkar da saxlanılıb.
Sui-qəsdləri hazırlayan rus agentləri hər sui-qəsd üçün 100 min dollara qədər ödəniş vəd ediblər. Cinayətkar şəbəkə hədəfləri yox etmək üçün silahlı hücum və ya avtomobil partlatma üsulları hazırlayıblar.
SBU-nun məlumatlarına görə, sui-qəsd dəstəsinin lideri Rusiyada həbsxanada cəza çəkərkən Rusiya kəşfiyyatı tərəfindən əməkdaşlığa cəlb edilib. Ona Moskvanın nəzarəti altında sui-qəsdçi qrupu əlaqələndirmək tapşırılıb.
Şəbəkə üzvləri müşahidə və sui-qəsd qruplarına bölünüb. Bəzi şübhəlilər Ukraynaya turist kimi daxil olub və sui-qəsd hədəflərinə yaxın ərazilərdə kirayə evlər tutublar. Qeyd edilir ki, sui-qəsd dəstəsi maliyyələşdirmə üçün kriptovalyuta cüzdanlarından istifadə edib və fəaliyyətlərini xarici bank kartlarından istifadə edərək gizlədiblər.
Agentlər hədəfləri izləmək üçün çatdırılma kuryeri kimi fəaliyyət göstəriblər. Rəqəmsal xəritələr vasitəsilə həyata keçirilən izləmələr koordinatora çatdırılıb.
Həbs edilən şəxslər qəsdən adam öldürməyə cəhddə mühakimə olunacaqlar. Qanunsuz silah saxlama da iş materiallarına daxil edilib.
Tahir TAĞIYEV
