Fevral ayının əvvəlinə Birləşmiş Ştatların dünya təşkilatının müntəzəm büdcəsinə olan borcu təxminən 2,19 milyard dollar təşkil edirdi ki, bu da BMT-yə üzv bütün ölkələrin ümumi borcunun 95%-nə bərabərdir.
“Associated Press”-in yazdığına görə, ABŞ Birləşmiş Millətlər Təşkilatına borclu olduğu təxminən 4 milyard dollardan 160 milyon dollarını ödəyib.
BMT-nin mətbuat katibi Stefan Düjarrik qeyd edib ki, Donald Tramp administrasiyasının son ödənişi BMT-nin müntəzəm əməliyyat büdcəsinə ayrılıb.
Təşkilatın məlumatına görə, ABŞ müntəzəm büdcəyə 2,196 milyard dollar, o cümlədən cari il üçün 767 milyon dollar, həmçinin BMT-nin sülhməramlı əməliyyatlarının ayrı büdcəsinə 1,8 milyard dollar borcludur.
BMT-nin Baş katibi Antoniu Quterreş keçən ayın sonunda xəbərdarlıq edib ki, təşkilatın maliyyə qaydaları yenidən nəzərdən keçirilməzsə və ya bütün 193 üzv dövlət öz üzvlük haqqlarını ödəməzsə, "birbaşa maliyyə fəlakəti" ilə üzləşəcək. BMT üzvlərinə ünvanladığı məktubda Quterreş qeyd edib ki, müntəzəm büdcə üçün vəsait iyul ayına qədər tükənə bilər ki, bu da təşkilatın işinə ciddi təsir göstərəcək.
“Reuters”-in məlumatına görə, 2025-ci ildə ABŞ-ın dünya təşkilatına yardımı 3,3 milyard dollara qədər azalıb ki, bu da BMT-nin ümumi maliyyələşməsinin təxminən 14,8%-ni təşkil edir. 2024-cü ildə Vaşinqton təşkilata 14,1 milyard dollar, 2022-ci ildə isə 17,2 milyard dollar göndərmişdi.
Daha əvvəl Tramp BMT-ni potensialına uyğun gəlmədiyi üçün tənqid etmiş və ABŞ-ı Ümumdünya Səhiyyə Təşkilatı və YUNESKO da daxil olmaqla bir sıra BMT təşkilatlarından çıxarmışdı.
Almaz Həsənli
