Şirkət Tramp dövründə tətbiq edilən rüsumların tam geri qaytarılmasını tələb edir...
Poliqon xəbər verir ki, logistika şirkəti FedEx ABŞ Beynəlxalq Ticarət Məhkəməsinə müraciət edərək hökumətə qarşı iddia qaldırıb. Şirkət prezident Donald Trump-ın tətbiq etdiyi tariflər çərçivəsində ödədiyi gömrük rüsumlarının tam şəkildə geri qaytarılmasını tələb edir. İddia fevralın 23-də qaldırılıb.
Məhkəməyə müraciətə səbəb fevralın 20-də ABŞ Ali Məhkəməsinin Beynəlxalq Fövqəladə İqtisadi Səlahiyyətlər Qanunundan istifadəni qanunsuz hesab etməsi olub. Qərarda qeyd edilib ki, gömrük rüsumlarını müəyyən etmək səlahiyyəti Konqresə məxsusdur və fövqəladə səlahiyyətlər mexanizmi vasitəsilə bu prosesin yan keçilməsi hakimiyyət bölgüsü prinsipini pozur.
The Wall Street Journal nəşrinin məlumatına görə, FedEx məhkəmə şikayətində mübahisələndirilən tariflərə aid olan bütün göndərişlər üzrə tutulmuş rüsumların geri ödənilməsini, həmçinin bu məbləğlərə görə faizlərin hesablanaraq şirkətə qaytarılmasını tələb edir.
Qeyd olunur ki, sözügedən tariflər Tramp administrasiyası dövründə xarici ticarət siyasətinin sərtləşdirilməsi çərçivəsində tətbiq edilmişdi və bir sıra iri şirkətlər üçün əlavə maliyyə yükü yaratmışdı. Ali Məhkəmənin qərarı isə bu mexanizmin hüquqi əsaslarını şübhə altına alıb və oxşar iddiaların artmasına yol aça bilər.
Hüquqşünaslar hesab edirlər ki, əgər məhkəmə FedEx-in iddiasını təmin edərsə, bu, digər iri şirkətlər üçün də presedent yarada və dövlət büdcəsi üçün ciddi maliyyə nəticələrinə səbəb ola bilər.
Poliqon.info
