ain.az, Azertag saytından verilən məlumata əsaslanaraq xəbər yayır.
Bakı, 24 fevral, AZƏRTAC
Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin Nərimanov və Sabunçu Sosial Xidmət mərkəzlərində sosial reabilitasiya proqramına cəlb edilən əlilliyi olan uşaqların kitabxanalara ekskursiyaları keçirilib.
Agentliyin İctimaiyyətlə əlaqələr və kommunikasiya şöbəsindən AZƏRTAC-a verilən məlumata görə, ekskursiyanın keçirilməsində məqsəd uşaqların asudə vaxtlarının səmərəli təşkilini təmin etmək, onlarda mütaliə mədəniyyətini formalaşdırmaq və kitaba marağı artırmaqdan ibarətdir.
Nərimanov Sosial Xidmət Mərkəzinin benefisiarları Bakı Kitab Mərkəzini, Sabunçu Sosial Xidmət Mərkəzinin benefisiarları isə Firidun bəy Köçərli adına Respublika Uşaq Kitabxanasını ziyarət ediblər. Ekskursiyalar çərçivəsində uşaqlar kitabxanaların fəaliyyəti və uşaq ədəbiyyatı nümunələri ilə yaxından tanış olublar.
Tədbirlər çərçivəsində təşkil olunan “Nağıl saatı” zamanı Sosial Xidmət mərkəzlərinin mütəxəssisləri və uşaq yazıçısı Gülzar İbrahimova uşaqlara nağıllar oxuyub, onlara kitablar hədiyyə edilib.
Sonrakı hadisələr barədə daha çox məlumat almaq üçün ain.az saytını izləyin.
