Cənub-şərq bölgəsində fövqəladə vəziyyət elan edilib, yüzlərlə sakin təxliyə olunub...
Poliqon xəbər verir ki, Braziliyanın cənub-şərqində yerləşən Juiz-de-Fora və Uba şəhərlərində güclü leysan yağışları nəticəsində azı 30 nəfər həlak olub, daha 39 nəfər isə itkin düşmüş hesab olunur. Reuters agentliyinin məlumatına görə, təbii fəlakət nəticəsində 440 nəfər yaşadığı evlərdən təxliyə edilib, zərər çəkmiş ərazilərdə fövqəladə vəziyyət rejimi tətbiq olunub.
Məlumata əsasən, leysan yağışları daşqınlara və torpaq sürüşmələrinə səbəb olub, yaşayış evləri, yollar və sosial infrastruktur obyektləri ciddi ziyan görüb. Xilasetmə xidmətləri itkin düşənlərin axtarışını davam etdirir, bölgəyə əlavə qüvvələr cəlb edilib.
Braziliya Prezidenti Luis İnasio Lula da Silva sosial şəbəkə X hesabında baş verən faciə ilə bağlı başsağlığı verib. O bildirib ki, hökumətin əsas vəzifəsi humanitar yardımın göstərilməsi, sosial xidmətlərin bərpası, təxliyə olunan sakinlərə dəstək və dağıdılmış ərazilərin yenidən qurulmasına kömək etməkdir.
Reuters-in məlumatına görə, Braziliyada hər il dekabrdan mart ayınadək yağış mövsümü müşahidə olunur və bu dövrdə leysanlar, daşqınlar və torpaq sürüşmələri tez-tez baş verir. Lakin 2026-cı ilin fevral ayının yekunlarına əsasən, ölkənin cənub və şərq ştatlarında yağıntıların miqdarı normanı xeyli üstələyib. Xüsusilə Juiz-de-Fora şəhərində ötən ay müşahidə olunan yağıntılar yaşayış məntəqəsinin tarixində qeydə alınmış ən yağışlı dövr kimi qiymətləndirilib.
Mütəxəssislər bildirirlər ki, iqlim dəyişiklikləri fonunda Braziliyada ekstremal hava hadisələrinin tezliyi və intensivliyi artmaqdadır və bu cür fəlakətlərin qarşısının alınması üçün erkən xəbərdarlıq sistemlərinin gücləndirilməsi zəruridir.
Poliqon.info
