“Qarabağ” 71-ci, “Neftçi” 375-ci pillədə! – ARENA.AZ

Azərbaycanın “Qarabağ”, “Zirə”, “Sabah” və “Neftçi” futbol klublarının dünya reytinqindəki mövqeləri bəlli olub.

Arena.az xəbər verir ki, Beynəlxalq Futbol Tarixi və Statistikaları Federasiyası (İFFHS) bu gün klubların yeni dünya reytinqini açıqlayıb.

IFFHS 2021-ci il yanvarın 1-dən 2025-ci il dekabrın 31-dək olan müddəti əsas götürüb.

İFFHS-in cədvəlində planetin 501 ən yaxşı komandası yer alıb. Siyahıda Azərbaycanı 4 klub təmsil edib.

Hazırda 768,75 xalı olan “Qarabağ” yeni siyahıda 71-ci sırada qərarlaşıb.

Digər klublarımızdan “Neftçi” 300 xalla 375-ci, “Zirə” 290,5 xalla 399-cu, “Sabah” 283,25 xalla 411-ci pillədə yer alıb.

Dünya reytinqinə 1753 xalı olan Madrid “Real”ı rəhbərlik edir. İngiltərənin “Mançester Siti” klubu 1605 xalla ikinci pillədə qərarlaşıb. Braziliyanın “Flamenqo” komandası 1536 xalla ilk üçlüyü qapayır.

Reytinq siyahısının ilk 10 pilləsində qərarlaşmış komandaların siyahısını təqdim edirik:

1. Real (Madrid, İspaniya) – 1753 xal
2. Mançester Siti (İngiltərə) – 1605 xal
3. Flamenqo (Braziliya) – 1536 xal
4. PSJ (Fransa) – 1470 xal
5. Palmeyras (Braziliya) – 1449 xal
6. Bayern (Almaniya) – 1433 xal
7. İnter (Milan, İtaliya) – 1430 xal
8. Çelsi (İngiltərə) – 1334 xal
9. Barselona (İspaniya) – 1332 xal
10. Liverpul (İngiltərə) – 1265 xal