Mərkəzi Kaliforniyada yerləşən çip istehsalçısı "Nvidia"nın gəliri 3 aylıq dövrdə illik müqayisədə 73 faiz artaraq 68,1 milyar dollara çatıb və bazar gözləntilərini geridə qoyub.
AFN.az xəbər verir ki, "Nvidia" 2026-cı maliyyə ilinin dördüncü rübü hesab edilən və 25 yanvarda başa çatan 3 aylıq dövr üzrə maliyyə nəticələrini açıqlayıb.
Hesabata əsasən, şirkətin sözügedən dövrdə əldə etdiyi gəlir illik 73 faiz artımla 68,1 milyar dollara yüksəlib. Gəlirini əvvəlki rüblə müqayisədə 20 faiz artıran "Nvidia", ötən ilin müvafiq dövründə 39,3 milyar dollar gəlir əldə etmişdi. Bazar proqnozları isə şirkətin bu dövrdəki gəlirinin 65,56 milyar dollar olacağı istiqamətində idi.
"Nvidia"nın gəliri 2026-cı maliyyə ili ərzində ümumilikdə 65 faiz artaraq təxminən 216 milyar dollara çatıb. Çip istehsalçısı cari rüblə bağlı gəlir gözləntisini 78 milyar dollar olaraq açıqlayıb, lakin bu proqnozlarda Çindən əldə ediləcək məlumat mərkəzi gəlirlərinə dair hər hansı proqnozun nəzərə alınmadığını qeyd edib.
"Nvidia"nın xalis mənfəəti sözügedən rübdə illik 94 faiz artaraq 42,96 milyar dollara yüksəlib. Müqayisə üçün bildirək ki, şirkətin xalis mənfəəti ötən ilin eyni dövründə 22,1 milyar dollar olaraq qeydə alınmışdı. Şirkətin səhm üzrə mənfəəti də ötən ilin dördüncü rübündəki 89 sentdən bu dövrdə 1,76 dollara qalxıb.
"Nvidia"nın təsisçisi və baş icraçı direktoru (CEO) Censen Huanq emal tələbinin həndəsi silsilə ilə artdığını vurğulayaraq bildirib ki, müştərilər süni intellekt sənaye inqilabını və gələcək böyümələrini dəstəkləyən "süni intellekt fabrikləri" hesab edilən hesablama sistemlərinə investisiya qoymaq üçün yarışırlar.
