WUF13 təşkil edilmə və mahiyyət cəhətindən unikal bir tədbir olacaq.
APA xəbər verir ki, bunu BMT-nin Məskunlaşma Proqramının Qlobal Bilik və Təbliğat Bölməsinin direktoru Edlam Yemeru WUF13 tədbirinə hazırlıq işlərinə dair media brifinqində deyib.
“Bu konfrans bütün müvafiq tərəfləri və maraqlı qrupları dünyanın hər yerindən bir araya gətirir. Burada hökumətlər bir yerə toplanır. Həmçinin, hökumət nümayəndəsi olmayan müxtəlif maraqlı tərəflər və iştirakçılar da burada iştirak edir. Bu şəkildə dövlət sektoru, yəni hökumət nümayəndələri ilə qeyri-hökumət nümayəndələri, eləcə də özəl sektor arasında dialoq, fikir mübadiləsi və əməkdaşlıq üçün imkan yaradır. Buna görə də mahiyyəti, strukturu və təşkil olunma forması baxımından unikaldır”, - Yemeru qeyd edib.
O əlavə edib ki, qlobal miqyasda 1,1 milyard insan gecəqondularda və qeyri-rəsmi yaşayış məntəqələrində son dərəcə qeyri-sabit şəraitdə yaşayır, 300 milyondan çox insan isə evsizdir.
“World Open Forum məhz bu təcili vəziyyəti ön plana çıxaracaq və diqqətini bu mövzuya yönəldəcək.
2026-cı il həm də ona görə vacibdir ki, 10 il əvvəl – 2016-cı ildə, Ekvadorun Kito şəhərində dünya hökumətləri bir araya gələrək davamlı urbanizasiya üçün tədbirlər görməyə dair öhdəlik götürdülər. Bu, Habitat III Konfransı çərçivəsində baş verdi və nəticədə “Yeni Şəhər Gündəliyi” adlandırdığımız sənəd qəbul olundu. Beləliklə, dünya 10 il əvvəl Yeni Şəhər Gündəliyinə sadiqlik öhdəliyi götürmüşdü. İndi, 2026-cı ildə artıq 10 il keçib. İrəliləyişi nəzərdən keçirməyin, görülən işləri dəyərləndirməyin, nələrin əldə olunduğunu və harada boşluqların qaldığını müəyyənləşdirməyin vaxtıdır. Eyni zamanda, bu qlobal Yeni Şəhər Gündəliyinin növbəti 10 illik icra mərhələsini müəyyənləşdirməyin zamanıdır. Bu baxımdan, WUF13 da çox əhəmiyyətlidir. O, dünyanı bir araya gətirərək belə suallar verəcək: Yeni Şəhər Gündəliyinin icrasında nə dərəcədə uğurlu olmuşuq? Növbəti 10 il ərzində daha nələr edə bilərik?,- BMT nümayəndəsi bildirib.
