İran silahlı qüvvələri ABŞ və İsrailin həyata keçirdiyi hava hücumlarına cavab olaraq regiondakı bir neçə Amerika hərbi obyektinə zərbələr endirməyə başlayıb.
AFN.az xəbər verir ki, bu barədə məlumatı NBC telekanalı ABŞ rəsmilərinə istinadən yayıb. Mənbənin bildirdiyinə görə, İranın cavab zərbələri Yaxın Şərqdə yerləşən bir sıra hərbi bazaları hədəf alıb. Hazırda ən gərgin vəziyyətin Bəhreyndə olduğu bildirilir; yerli medianın məlumatına görə, ABŞ-ın Manamadakı 5-ci Donanmasının qərargahı raket atəşinə tutulub. Həmçinin İordaniya və Qatardakı ABŞ bazaları ətrafında partlayışların baş verdiyi və hava hücumundan müdafiə sistemlərinin aktiv şəkildə işlədiyi xəbər verilir.
İranın "Fars" agentliyi Tehranın bu əməliyyatı "dağıdıcı cavab" adlandırdığını və ABŞ-ın regiondakı bütün hərbi aktivlərinin legitim hədəf olduğunu bəyan etdiyini bildirib. Qatarda yerləşən "Əl-Cəzirə" telekanalı Dohada partlayış səslərinin eşidildiyini və ölkənin müdafiə nazirliyinin İran raketlərini zərərsizləşdirdiyini təsdiqləyib.
Xatırladaq ki, bundan bir qədər əvvəl ABŞ Prezidenti Donald Tramp İsrail ilə birgə İranda "böyük hərbi əməliyyatların" başladığını elan edib. Hazırda Yaxın Şərqin bir çox ölkələri, o cümlədən Qətər, Küveyt və BƏƏ öz hava məkanlarını mülki uçuşlar üçün bağlayıblar. Bölgədə genişmiqyaslı müharibə riski ən yüksək həddə çatıb.
