Tomas Jefferson Universitetinin alimləri aşkar ediblər ki, soyuq plazma ilə toxumaların müalicəsi orqanizmin təbii immunitet reaksiyasını gücləndirməklə əməliyyatdan sonrakı sağalmanı sürətləndirə bilər.
Oxuməni.az xəbər verir ki, eksperimentin nəticələri “Advanced Therapeutics” (AdvT) jurnalında dərc olunub.
Soyuq plazma aşağı temperaturlu ionlaşdırılmış qazdır ki, bu da artıq cərrahiyyə və dermatologiyada, o cümlədən yaraların müalicəsi, çapıqların korreksiyası və dəri cavanlaşdırılması üçün istifadə olunur. Lakin indiyə qədər onun canlı toxumalara necə təsir etdiyi barədə az məlumat var idi.
Eksperimentdə tədqiqatçılar siçanlardakı cərrahi yaraları soyuq plazma generatoru ilə müalicə ediblər. Altı saatdan sonra zədə nahiyəsində ilkin olaraq travma yerinə gələn və bərpa prosesini başlatan immunitet hüceyrələri olan neytrofillərin sayı artıb.
Alimlər müəyyən ediblər ki, plazma qısa müddətli aktiv oksigen növlərinin – immunitet sisteminə siqnal verən və sağalma mexanizmlərini aktivləşdirən molekulların artmasına səbəb olur. Başqa sözlə, texnologiya orqanizmi bərpa prosesini daha sürətli başlamağa "təşviq edir".
Toxuma analizi göstərib ki, müalicədən sonra əzələlərin regenerasiyası ilə əlaqəli genlərin və siqnal yollarının fəaliyyəti güclənir. İki həftə sonra müalicə alan heyvanlarda sağalan toxumada daha az piy yığıntısı və normal əzələ bərpasının daha çox əlamətləri müşahidə olunub. Bu, dermatoloji prosedurlardan sonra soyuq plazma ilə müalicə olunan xəstələrin dəri elastikliyinin artdığını bildirmələrini izah edə bilər.
Alimlər qeyd edirlər ki, regenerasiyanı stimullaşdırmaqla yanaşı, soyuq plazma antibakterial təsirə də malikdir. Gələcəkdə tədqiqatçılar plazma və standart antibiotiklərin birləşməsinin infeksiya riskini azaldıb-azaltmayacağını və cərrahi müalicənin nəticələrini yaxşılaşdırıb-yaxşılaşdırmayacağını öyrənməyi planlaşdırırlar.
Almaz Həsənli
