Marketpleyslərdə alkoqol asılılığından xilas edəcəyini vəd edən təbii tərkibli damcılara, məsələn, “Alkostop” adlı məhsullara rast gəlmək mümkündür. Lakin narkoloq, psixiatr və Ruslan İsayev “Gazeta.Ru”ya açıqlamasında bildirib ki, bu cür vasitələr tərkibinə əsasən yalnız asma (paxmel) əlamətlərini yüngülləşdirir.
Həkimin sözlərinə görə, “alkoqolizmə qarşı damcılar”ın tərkibində adətən təhlükəli komponentlər olmur. Əksinə, onların tərkibi daha çox asma sindromunu azaltmağa yönəlib. Klinikada stasionar detoksikasiya zamanı da oxşar maddələrdən — vitaminlərdən, kəhrəba turşusundan, həmçinin toksinlərin bağlanıb orqanizmdən xaric olunmasına kömək edən komponentlərdən istifadə olunur. Fərq ondadır ki, klinik şəraitdə bunlar tablet və ya infuzion terapiya formasında tətbiq edilir.
Belə məhsulların tərkibində tez-tez пустырник (anaotu) da yer alır. İstehsalçılar iddia edirlər ki, guya bu bitki alkoqola qarşı ikrah hissi yaradır və nəticədə insan içkini tərgidə bilir. Lakin İsayev bu fikri qəti şəkildə təkzib edir.
Onun sözlərinə görə, anaotunun “həzm sistemi sinir uclarını aktivləşdirərək alkoqola qarşı ikrah yaratması” barədə iddiaların heç bir elmi əsası yoxdur. Bu bitkinin farmakoloji xüsusiyyətlərində spirtə qarşı davamlı fizioloji ikrah formalaşdıran mexanizm mövcud deyil. Anaotu sadəcə yüngül sakitləşdirici təsir göstərir. Digər komponentlər də əsasən asma zamanı orqanizmə dəstək olmaq, intoksikasiyanın təsirlərini azaltmaq məqsədi daşıyır.
Həkim qeyd edib ki, nəzəri baxımdan belə preparatlar plasebo effekti verə bilər, lakin bunun üçün ayrıca elmi araşdırma aparılmalıdır.
Müqayisə üçün İsayev təsdiqlənmiş təsir mexanizminə malik dərmanları misal çəkib. Onun sözlərinə görə, narkoloq xüsusi damcılar təyin edə bilər ki, onlar asetaldehiddehidrogenaza fermentinin sintezini bloklayır. Bu zaman alkoqol asetaldehidə qədər parçalanır, lakin daha sonra metabolizə olunmur, qanda dövr etməyə başlayır və kəskin toksik reaksiya yaradır.
Həkim vurğulayıb ki, bu cür preparatlar yalnız ətraflı tibbi müayinədən sonra, həkim təyinatı ilə və psixoterapiya və reabilitasiya prosesinə əlavə vasitə kimi istifadə olunmalıdır.
Sonda o əlavə edib ki, “iki həftəyə ödemlər çəkiləcək və yuxu normallaşacaq” kimi vədlər şişirdilmişdir. Əgər insan sadəcə alkoqoldan imtina edərsə, iki həftə ərzində əlavə vasitə olmadan da ödemlər azalacaq, yuxu normallaşacaq və ümumi vəziyyət yaxşılaşacaq.
