ain.az, Modern.az portalına istinadən məlumatı açıqlayır.
Türkiyənin İstanbulu elə bir şəhərdir ki, hər küçəsində ayrı bir tarix, hər addımında fərqli bir mədəniyyət yaşayır. Bu şəhər sadəcə iki qitəni deyil, həm də keçmişlə bu günü birləşdirən nadir məkanlardandır. Onun ruhunu duymaq üçün isə xüsusi bir nöqtəyə getmək kifayətdir. O nöqtə İstanbulun ürəyi sayılır.
İstanbulda bir məkan var
İstanbulda bir məkan var ki, ora çatanda şəhərin nəbzini istər-istəməz hiss edirsən. Sanki minlərlə insanın addım səsləri, musiqi notları, küçə satıcılarının çağırışları və uzaqdan gələn tramvay zəngi bir melodiyaya çevrilir. Bu yer - Taksim meydanıdır.
İstanbulun Beyoğlu rayonunda yerləşən Taksim sadəcə bir meydan deyil. Tarixin izlərini özündə yaşadan şəhərin yaddaşıdır. Meydanın mərkəzində ucalan Cümhuriyyət Abidəsi Türkiyə Cümhuriyyətinin quruluş ruhunu, azadlıq və yenilənmə ideyasını daşıyır. Milli bayramlarda burada minlərlə insan toplaşır, amma ilin istənilən günündə Taksim dostların, sevgililərin, turistlərin ilk dayanacağı, görüş yeridir.
Burada dayanıb ətrafa göz gəzdirəndə İstanbulun daim hərəkətdə olduğunu bir daha anlayırsan. İnsan seli heç vaxt səngimir. Bir tərəfdə gənclərin şaqraq gülüş səsləri, digər tərəfdə küçə musiqiçisinin gitarasında şövqlə ifa etdiyi retro türk mahnısı qəribə hisslər yaradır. Turistlərin sayı həddindən çoxdur. Ehtiyatlı olmaq lazım gəlir ki, Nostalji Tramvayın hərəkətinə mane olmayasan. Hər addımda başqa bir həyat hekayəsi gizlənir.
İstiqlalın sehri
Taksimdən aşağı doğru uzanan İstiqlal caddəsi isə tamam başqa bir aləmdir. Küçə boyunca hərəkət edən Nostalji Tramvay sanki səni zamanın içindən keçirir. Qırmızı vaqonun zəngi çalınanda küçədə bir anlıq romantik bir film səhnəsi yaranır.
İstiqlal caddəsində addımladıqca, qədim binaların eyvanları, sənət qalereyaları, kitab mağazaları və kafelər insanı özünə çəkir. Burada bir fincan türk qəhvəsi içmək, küçə musiqiçilərini dinləmək, ya da sadəcə izdihamın içində itmək belə zövqdür.
İstiqlaldan bir qədər irəlidə isə artıq başqa bir küçənin nəfəsi duyulur - Qalata istiqamətinə aparan yol.
Atatürkün gecələdiyi hotel
Bir vaxtlar xristianların yaşadığı və Pera adlanan bu ərazi Taksimə çox yaxındır. Bu məkan tarix boyu müxtəlif millətlərin və mədəniyyətlərin qovuşduğu yer olub.
Taksim ətrafında yerləşən tarixi binalardan biri də "Vera Palace Hotel"dir. Vaxtilə Türkiyə Cümhuriyyətinin qurucusu Mustafa Kemal Atatürkün burada gecələdiyi deyilir. Otel xüsusilə xaricilər, əsasən də ingilislər arasında sevilən məkanlardandır. Bu fakt belə Taksimin nə qədər beynəlxalq və kosmopolit ruh daşıdığını göstərir.
Qalatanın cazibəsiTaksim və Peradan sonra yol səni Qalataya aparır. Burada ucalan Qalata qülləsi müasir şəhər mənzərəsinin içində möhtəşəm görünür. Sanki əsrlərin dərinliyindən boylanaraq bu günə şahidlik edir. Qüllənin ətrafında dolaşdıqca dar küçələr, kiçik emalatxanalar və sənət məkanları insanı başqa bir zamana aparır.
Burada yerləşən Kamondo pilləkənləri isə memarlıq baxımından xüsusi diqqət çəkir. Dalğavari forması ilə seçilən bu pilləkənlər təkcə keçid yolu deyil, həm də şəhərin estetik simvollarından biridir.
Tarixin nəfəsi
Taksim ətrafında dolaşdıqca anlayırsan ki, İstanbulun tarixi yalnız muzey divarlarında deyil, küçələrin özündə yaşayır. Bir az aralıda ucalan Ayasofya əsrlərin sükutunu qoruyur. 360-cı ildə imperator Konstantios tərəfindən inşa edilən və sonralar yenidən tikilən bu möhtəşəm abidə Bizansdan Osmanlıya, oradan da müasir Türkiyəyə uzanan böyük bir tarix körpüsüdür.
İstanbulun hər daşında imperiyaların izi var. Amma Taksimdə bu tarix müasir həyatla qucaqlaşır. Keçmiş və bu gün burada yanaşı addımlayır. Çünki Taksim yalnız tamaşa olunacaq bir yer deyil - hiss ediləcək, hisslərin yaşandığı bir məkandır.
Burada şəhərin enerjisi səni içinə çəkir. Gün batanda meydanın işıqları yanır, küçələr daha da canlanır və İstanbul öz sehrini göstərməyə başlayır. Bir gün yolunuz İstanbula düşərsə, Taksim meydanına mütləq baş çəkin. Gözlərini yumub şəhərin səsinə qulaq versən, o səs sənə deyəcək - sən artıq iki qitənin qovuşduğu şəhərin ürəyindəsən.
Bəzi şəhərlər də insan kimidir, toxunduqca yaşadığını hiss edirsən. İstanbul isə o şəhərlərin ən duyğulu və güclü təəssürat yaradanlarındandır.
Daha ətraflı məlumat və yeniliklər üçün ain.az saytını izləyin.
