Tanışını öldürməkdə təqsirləndirilən Şəmşad Əhmədovun barəsindəki qərardan kassasiya şikayəti verilib.
Pravda.az-ın əldə etdiyi məlumata görə, hazırda şikayət Ali Məhkəmənin hakimi Teyyub Muxtarovun sədrliyi ilə araşdırılır.
Qeyd: Hadisə 2023-cü ilin yanvarında paytaxtın Nərimanov rayonu, Əliyar Əliyev küçəsində qeydə alınıb. Belə ki, 1974-cü il təvəllüdlü Şəmşad Əhmədov şəxsi münasibətlər zəminində aralarında yaranan mübahisə zamanı bıçaqla tanışının, 1977-ci il təvəllüdlü İsa Əbdüləzimova xəsarətlər yetirərək qətlə yetirib. Şəmşad Əhmədov şübhəli şəxs qismində tutularaq istintaqa cəlb edilib.
Bakı Ağır Cinayətlər Məhkəməsinin hökmü ilə o, 10 il 6 ay müddətinə azadlıqdan məhrum edilib. Hökmə əsasən, Şəmşad Əhmədov barəsində irəli sürülmüş Cinayət Məcəlləsinin 120.2.1-ci (qəsdən adam öldürmə, cinayətkar birlik-təşkilat tərəfindən qəsdən adam öldürmə) maddəsi 126.3-cü (qəsdən sağlamlığa ağır zərər vurma ehtiyatsızlıqdan zərərçəkmiş şəxsin ölümünə səbəb olduqda) maddəsinə tövsif olunub. Bakı Apellyasiya Məhkəməsi apellyasiya şikayətini təmin etməyib. Ali Məhkəmənin qərarına əsasən, aşağı instansiya məhkəməsinin çıxardığı qərar qismən ləğv edilib, iş yenidən baxılması üçün apellyasiya instansiyası məhkəməsinə göndərilib. Bakı Apellyasiya Məhkəməsinin qərarına əsasən, protest qismən təmin edilib, Bakı Ağır Cinayətlər Məhkəməsinin çıxardığı hökm mülki iddianın mənəvi ziyan hissəsində və cəza təyini hissəsində dəyişdirilib. Belə ki, mmülki iddianın mənəvi ziyan hissəsi qismən təmin olunub. Təqsirləndirilən şəxsdən 10 000 manat tutularaq zərərçəkmiş şəxsin hüquqi varisinə ödənilməsi barədə qərar çıxarılıb. Mülki iddianın mənəvi ziyan hissəsi qalan hissədə rədd edilib. Təqsirləndirilən Şəmşad Əhmədova 11 il müddətinə azadlıqdan məhrum etmə cəzası təyin edilib.
Kamal Məmmədov
