Oxu.az portalından əldə olunan məlumata əsasən, ain.az xəbər verir.
Yaşlı nəslin rifahı üçün tənhalıq və sosial təcrid ciddi təhdid hesab olunur.
Oxu.Az xəbər verir ki, bu barədə "RIA Novosti" Tokio Sağlam Uzunömürlülük Tədqiqatları Mərkəzinin araşdırmalarına istinadən məlumat yayıb.
Araşdırmaya görə, sosial təcrid və tək qalmaq sağlam və uzunömürlü həyatın qarşısını alan əsas amillərdən biridir. Mütəxəssislər bildiriblər ki, sağlam ömür müddətinə düzgün qidalanma və fiziki aktivlik kimi faktorlar təsir göstərsə də, sosial münasibətlərin rolu xüsusi əhəmiyyət kəsb edir.
Ekspertlər vurğulayıblar ki, Yaponiyada tarixən yerli icmalar arasında qarşılıqlı əlaqələr, o cümlədən qonşuluq birlikləri və müxtəlif sosial fəaliyyət növləri mövcud olub. Onların fikrincə, məhz bu cür sosial bağlar ölkədə yüksək uzunömürlülük göstəricilərinə mühüm töhfə verib.
Bununla belə, tədqiqatçılar qeyd ediblər ki, müasir həyat tərzi insanların sosial davranışlarını dəyişir. Bu gün bir çox insanlar canlı ünsiyyət qurmadan, məsələn, onlayn sifarişlər vasitəsilə gündəlik ehtiyaclarını ödəyə bilirlər. Nəticədə, ünsiyyətə əlavə yük kimi baxanların sayı getdikcə artır.
Mütəxəssislər "zəif əlaqələr" adlandırılan münasibətlərin qorunmasının vacibliyini də qeyd ediblər. Bu anlayış tez-tez görüşmək məcburiyyəti olmadan ətrafdakılarla, hətta təsadüfi təmasların saxlanılmasını da əhatə edir.
Qeyd edək ki, Yaponiya dünyada orta ömür uzunluğunun ən yüksək olduğu və əhalisinin yaş strukturuna görə ən qoca ölkələrdən biri hesab olunur. Rəsmi statistikaya görə, ölkədə qadınların orta ömür uzunluğu təxminən 87 il, kişilərin isə 81 ildir. Eyni zamanda, ölkə əhalisinin təxminən 30%-i 65 yaşdan, 16%-i isə 75 yaşdan yuxarıdır.
Hadisənin gedişatını izləmək üçün ain.az saytında ən son yeniliklərə baxın.
