Jurnalist ABŞ və İsrailin İrana qarşı zərbələrini sərt tənqid etdikdən sonra tərəflər arasında açıq qarşıdurma yaranıb...
Poliqon xəbər verir ki, Donald Tramp jurnalist Taker Karlsonu MAGA (Make America Great Again) hərəkatının bir hissəsi hesab etmədiyini bəyan edib. Bu açıqlama Karlsonun ABŞ və İsrailin İrana qarşı həyata keçirdiyi hücumları kəskin tənqid etməsindən sonra səsləndirilib.
Karlson hücumları “tamamilə iyrənc və cinayət xarakterli” adlandıraraq bildirib ki, bu müharibə ABŞ-nin deyil, İsrailin maraqları üçün aparılır. Onun sözlərinə görə, Vaşinqtonun Yaxın Şərqdə yeni müharibəyə cəlb olunması Amerika cəmiyyətinin maraqlarına uyğun deyil.
Bu fikirlərə cavab olaraq Donald Tramp Karlsonu sərt tənqid edib. ABŞ prezidenti bildirib ki, “Taker yolunu azıb, o artıq MAGA deyil və bunu başa düşəcək qədər ağıllı da deyil”.
Analitiklərin fikrincə, bu qarşıdurma ABŞ daxilində İranla bağlı hərbi əməliyyatlara münasibətdə fikir ayrılıqlarının artdığını göstərir. Xüsusilə Trampın siyasi bazasının bir hissəsi Yaxın Şərqdə yeni müharibələrə qarşı çıxır və ABŞ-nin xarici müdaxilələrinin azaldılmasını tələb edir.
Siyasi müşahidəçilər hesab edir ki, Karlson kimi tanınmış media fiqurlarının açıq tənqidi ABŞ-də müharibə ilə bağlı ictimai və siyasi debatların daha da güclənməsinə səbəb ola bilər.
Poliqon.info
