Dron hücumları ABŞ texnologiya şirkətlərinin Yaxın Şərqdəki bulud infrastrukturunun nə qədər həssas olduğunu göstərir...
Poliqon xəbər verir ki, Financial Times nəşrinin məlumatına görə, İran ABŞ texnologiya şirkətlərinə məxsus data-mərkəzlərini hədəfə alaraq regionda yeni bir qarşıdurma cəbhəsi açıb.
Bildirilir ki, dron hücumları nəticəsində Amazon Web Servicesə məxsus obyektlər Birləşmiş Ərəb Əmirlikləri və Bəhreyn ərazisində zərər görüb. Analitiklərin fikrincə, bu hücumlar ABŞ-nin regiondakı texnoloji gücünün əsas simvollarından hesab edilən bulud infrastrukturunun hava hücumlarına qarşı nə qədər həssas olduğunu nümayiş etdirir.
İranın Fars News Agency agentliyi isə məlumat yayıb ki, son hücumlar zamanı Tehran həm Amazon, həm də Microsofta məxsus obyektləri hədəfə alıb. Agentlik İslam İnqilabı Keşikçiləri Korpusu ilə əlaqəli hesab olunur.
Ekspertlərin qiymətləndirməsinə görə, bu hadisə ABŞ-nin qlobal bulud hesablama bazarında dominant mövqeyə malik olan “hipermiqyaslı” texnologiya şirkətlərinə qarşı həyata keçirilən ilk hərbi hücumlardan biri kimi qiymətləndirilir.
Mütəxəssislər qeyd edirlər ki, belə hücumlar Körfəz ölkələrinin texnoloji inkişaf planlarına da ciddi təsir göstərə bilər. Xüsusilə Birləşmiş Ərəb Əmirlikləri və Səudiyyə Ərəbistanı yaxın illərdə süni intellekt infrastrukturu və data-mərkəzlərinin yaradılmasına milyardlarla dollar investisiya qoymağı planlaşdırır.
Analitiklər bildirirlər ki, bu layihələr neftdən asılı iqtisadiyyatların şaxələndirilməsi strategiyasının əsas elementlərindən biridir. Lakin texnoloji infrastruktura qarşı hücumlar regionda investisiya risklərini artıraraq bu planların həyata keçirilməsini çətinləşdirə bilər.
Poliqon.info
