İqtisadiyyat Nazirliyi yanında Dövlət Vergi Xidmətinin təşkilatçılığı ilə keçirilən “Vergi sistemində gələcəyə baxış: yeni idarəetmə modeli və data əsaslı qərarlar” forumu çərçivəsində vergi ödəyiciləri arasında fərqlənən şirkətlər mükafatlandırılıb. Tədbir zamanı “Prime Cotton” MMC “Özəl sektor üzrə fəal ixracatçı” nominasiyası üzrə təltif olunub.
Forumda Azərbaycan Respublikasının Baş nazirinin müavini Samir Şərifov, iqtisadiyyat naziri Mikayıl Cabbarov, Dövlət Vergi Xidmətinin rəisi Orxan Nəzərli, dövlət qurumlarının nümayəndələri və biznes ictimaiyyətinin təmsilçiləri iştirak ediblər. Çıxışlarda ölkədə makroiqtisadi sabitliyin qorunması, vergi sistemində aparılan islahatlar, rəqəmsal transformasiya və data əsaslı idarəetmə modelinin tətbiqi kimi mühüm məsələlər müzakirə olunub.
Forum çərçivəsində müxtəlif nominasiyalar üzrə fərqlənən vergi ödəyiciləri mükafatlandırılıb. “Prime Cotton” MMC-nin “Özəl sektor üzrə fəal ixracatçı” nominasiyası üzrə təltif olunması şirkətin son illərdə beynəlxalq sertifikatlar əldə etməsi nəticəsində qlobal bazarlarda mövqeyini genişləndirməsi, ixrac potensialını artırması və Azərbaycanın qeyri-neft sektorunun inkişafına verdiyi töhfənin göstəricisi kimi qiymətləndirilib.
Bu mükafat, həmçinin Azərbaycanın pambıq və tekstil sənayesinin qlobal bazarda rəqabət qabiliyyətinin artdığını, yerli şirkətlərin ixrac istiqamətində əldə etdiyi uğurların daha da genişləndiyini nümayiş etdirir.
“Prime Cotton” MMC bundan sonra da dayanıqlı inkişaf, keyfiyyətli istehsal və ixrac potensialının genişləndirilməsi istiqamətində fəaliyyətini davam etdirərək Azərbaycanın qeyri-neft iqtisadiyyatının inkişafına töhfə verməyi hədəfləyir.
“Prime Cotton” MMC-nin Baş icraçı direktoru Rövşən Mahmudov mükafatla bağlı bildirib: “Bu mükafat Prime Cotton komandası üçün böyük qürur və məsuliyyətdir. Bizim əsas məqsədimiz Azərbaycan pambıq və tekstil məhsullarını beynəlxalq bazarlarda daha geniş tanıtmaq, ixrac imkanlarımızı artırmaq və ölkəmizin qeyri-neft sektorunun inkişafına davamlı töhfə verməkdir. Gələcəkdə də innovativ yanaşma və yüksək keyfiyyət standartları ilə fəaliyyətimizi genişləndirməyi planlaşdırırıq”.
Qeyd edək ki, “Prime Cotton” MMC 30 ildən artıq təcrübəyə malik, pambıqçılıq sahəsində Azərbaycanın aparıcı şirkətlərindən biridir. “GP Cotton Holdings” qrupunun tərkibinə daxil olan şirkət pambıq istehsalı ilə yanaşı, mahlıc, iplik, pambıq yağı və pambıq jmıxı istehsalı ilə də məşğuldur. “Prime Cotton” müasir texnologiyalar, davamlı istehsal zənciri və keyfiyyətə əsaslanan yanaşması ilə yerli və beynəlxalq bazarlarda rəqabətədavamlı məhsullar təqdim edir.
