“Tesla” və “SpaceX” şirkətlərinin sahibi İlon Mask artıq ikinci il ardıcıl olaraq “Forbes” versiyasına görə dünyanın ən varlı milyarderləri siyahısına başçılıq edir. Bu barədə “Forbes USA” tərəfindən dərc olunmuş siyahıda qeyd olunur. Onun sərvəti 839 milyard dollar qiymətləndirilir ki, bu da ötən illə müqayisədə (342 milyard dollar) demək olar ki, 2,5 dəfə çoxdur. Mask bundan əvvəl 2022-ci ildə də siyahıya rəhbərlik etmişdi.
Siyahıda ikinci və üçüncü yerləri “Google”un həmtəsisçiləri Larri Peyc və Sergey Brin tutub. “Forbes” onların sərvətini müvafiq olaraq 257 milyard dollar və 237 milyard dollar səviyyəsində qiymətləndirir. Ötən il onlar 144 milyard və 138 milyard dollar sərvətlə 7-ci və 8-ci yerlərdə qərarlaşmışdılar. 2024-cü ildə Peyc ilk dəfə ilk onluğa daxil olmuş, Brin isə 11-ci yeri tutmuşdu.
Dünyanın ən varlı milyarderləri siyahısında dördüncü yeri “Amazon”un qurucusu Ceff Bezos tutub. Bu, onun 2016-cı ildən bəri ilk dəfə ilk üçlükdən kənarda qalmasıdır. “Forbes USA” onun sərvətini 224 milyard dollar qiymətləndirir ki, bu da ötən illə müqayisədə cəmi 9 milyard dollar çoxdur. Bezos 2021-ci ildə “Amazon”un baş direktoru vəzifəsindən ayrılıb.
