ABŞ Hərbi Dəniz Qüvvələrinin yanacaq təminatı gəmisi USNS Big Horn Omanın Dukm limanına gedərkən marşrutu qısaltmaq qərarı nəticəsində Ərəb dənizinin şimal hissəsində dayazlığa oturub. Kapitan təhlükəsiz, lakin daha uzun marşrut əvəzinə dayaz sulardan keçən riskli yolu seçib...
Poliqon xəbər verir ki, bu barədə Business Insider yazır.
Hərbi Dəniz Qüvvələrinin apardığı araşdırmaya görə, hadisə 23 sentyabr 2024-cü ildə "bir sıra yanlış qərarlar, prosedurlara əməl edilməməsi və risklərin düzgün qiymətləndirilməməsi" səbəbindən baş verib. Kapitan və növbədə olan zabitlər qısaldılmış marşrut üçün lazımi hazırlıq görməyib və qəzanın qarşısını ala biləcək naviqasiya xəbərdarlıqlarını nəzərə almayıblar.
Dukm A adlanan təhlükəli keçiddən keçərkən gəmi 17–18 düyün sürətlə hərəkət edib. Təhlükəsizlik sistemlərinin xəbərdarlıqları və dərinlik ölçən cihazın (fatometrin) siqnalları nəzərə alınmayıb. Bildirilir ki, həmin vaxt kapitan körpüsündə musiqi səslənirdi və bu da ekipajın diqqətini yayındırırdı.
Nəticələr və zərər
Hadisə nəticəsində USNS Big Horn gəmisinin gövdəsi, daxili konstruksiyaları, sol pərvanəsi və sükanı ciddi zədələnib. Bərpa və yedəkləmə xərcləri 20 milyon dollardan çox olub. Bu məbləğə daxildir:
7,5 milyon dollar – yedəkləmə xərcləri
8,6 milyon dollar – Omanda göstərilən xidmətlər
1,9 milyon dollar – yanacağın boşaldılması
2,4 milyon dollar – ABŞ-da əlavə xərclər
Hərbi Dəniz Qüvvələrinin müstəntiqləri bildiriblər ki, gəminin dayazlığa oturması "qarşısı alına biləcək səhv" olub. Kapitan və bir neçə zabitə qarşı inzibati və ya intizam tədbirləri görülməsi tövsiyə edilib. Lakin onlar hələ də gəmidə xidmətlərini davam etdirirlər. Komandanlıq onların vəzifələri ilə bağlı qərarın hələ müzakirə mərhələsində olduğunu bildirir və detalları açıqlamır.
Riskli qərar
Hadisədən əvvəl şturman daha təhlükəsiz və dərin sulu marşrut təklif edib. Lakin kapitan yolu qısaltmağa qərar verib. Gəmi hərəkət edərkən bir neçə dəfə vibrasiya edib və dənizin dibinə toxunub, bundan sonra tamamilə dayazlığa oturub. Araşdırma göstərib ki, kapitan körpüsündə olan zabitlər məhdud sularda hərəkət etdiklərini dərk etməyiblər və tələb olunan naviqasiya brifinqi keçirilməyib.
Poliqon.info
