Sosial sahədə vətəndaşlara yönəlmiş güzəştlərin tətbiqi Azərbaycan gündəmində aktual məsələlərdən biridir. Ekspert İlqar Hüseynli QHT.az-a açıqlamasında bildirib ki, bu addım yalnız mümkün deyil, eyni zamanda dövlətin büdcəsinə ciddi yük yaratmadan həyata keçirilə bilər. Onun sözlərinə görə, əlillər, müharibə veteranları, tələbələr və az təminatlı ailələr üçün nəzərdə tutulan güzəştlərin tətbiqi sosial ədaləti gücləndirən addım olaraq qiymətləndirilə bilər.
İlqar Hüseynli xatırladır ki, SSRİ dövründə tələbələr üçün endirimli aylıq nəqliyyat kartları mövcud olub və bu kartlar həm avtobus, həm də metro üçün istifadə edilə bilirdi. Hətta avia biletlərdə 50%-ə qədər endirim tətbiq olunurdu. O qeyd edir ki, bu təcrübə göstərir ki, sosial güzəştlərin praktik tətbiqi mümkündür və müstəqil Azərbaycan dövləti də bu praktikanı təkrarlaya bilər.
Ekspert əlavə edir ki, Azərbaycan artıq kifayət qədər büdcə gəlirlərinə malikdir, xüsusilə neft və enerji sektorundan əldə olunan gəlirlər sosial sahədə güzəştlərin tətbiqi üçün kifayət edir. Endirimli tariflər yalnız ictimai nəqliyyatda deyil, həmçinin digər sosial xidmətlərdə də tətbiq edilə bilər və bu, tələbələr, az təminatlı ailələr, təqaüdçülər və əlillər üçün əhəmiyyətli dəstək olacaq.
Dünyanın bir çox ölkəsində tələbələr və digər sosial qruplar üçün endirimli tariflər mövcuddur. Məsələn, Türkiyədə tələbələr həm nəqliyyatda, həm də yemək və digər xidmətlərdə güzəştlərdən istifadə edir. İlqar Hüseynli hesab edir ki, Azərbaycan da qonşu ölkələrin təcrübəsini öyrənərək bu praktikaları uğurla tətbiq edə bilər.
Ekspert vurğulayır ki, vətəndaş cəmiyyəti və ombudsman aparatı sosial sahədə bu məsələləri qaldırır. “Əgər dövlət qurumları məsələyə diqqət yetirirsə, bu güzəştlərin tətbiqi aktuallaşa bilər. Sosial ədalətin gücləndirilməsi üçün bu, həm praktik, həm də vacib addımdır” – deyə Hüseynli qeyd edib.
Zəhra Ağayeva
