Milli Məclisin İnsan hüquqları komitəsinin üzvü Elman Nəsirov Siyasi Menecment İnstitutunun direktoru, politoloq Azər Qasımlının 12 il müddətinə azadlıqdan məhrum edilməsinin müzakirə yaratmasına münasibət bildirib.
Deputat Pravda.az-a açıqlamasında deyib ki, Azərbaycan hüquqi dövlətdir və hüquqi dövlətdə hər kəs törədiyi əmələ görə məsuliyyət daşıyır.
E.Nəsirovun sözlərinə görə, hər kəs törətdiyi cinayət əməlinin səviyyəsindən asılı olaraq Cinayət Məcəlləsinin və Cinayət-Prossesual Məcəlləsinin müvafiq bəndləri üzrə cəzasını alır: “Azərbaycan demokratik inkişaf yolunu seçmiş dövlət olduğundan heç kim hakimiyyəti sərt tənqid etdiyinə görə cəzalana bilməz. Əksinə, mən özüm müxalifət nümayəndələrinin mütləq əksəriyyəti ilə debatlarda oluram. Debatların gedişatında belə bunun canlı şahidiyəm, prosesin içindəyəm. Kəskin şəkildə hökuməti, hakimiyyəti tənqid edirlər, mən də öz arqumentlərimi onlara qarşı qoyuram. Hələ indiyə qədər belə hal olmayıb ki, mənimlə debata çıxan müxalifət nümayəndələrindən kimsə buna görə cəzasını alsın. Belə şey yoxdur. Kimsə cəzalanıbsa, bilin ki, ortada konkret cinayət əməli var. Burada başqa tendensiya da mövcuddur. Görəndə ki tutduğu yol cinayət tərkibi yaradıb, onun həbsi labüddür, həmin şəxs hakimiyyəti tənqid ritorikasını daha da kəskinləşdirir, kəskin ifadələr işlədir və sabah cinayət əməlinə görə həbs ediləndə son çıxışlarını ön plana çəkir ki, guya belə çıxışlar edib, tənqidlər səsləndirib, hakimiyyət də həbs edib. Xeyr, sənin həbsin tənqidinlə bağlı deyil. Konkret cinayət tərkibli əməllərin var. Bu hər kəsə aiddir. Azərbaycanda mövqeyinə, baxışlarına görə heç kim həbs edilmir. Mövqeyin və baxışların Azərbaycanda hakimiyyətin, konstitusion quruluşun zorla devrilməsinə, üsyana çağırışa köklənibsə, bu halda, əlbəttə ki, cinayət məsuliyyətinə cəlb ediləcəksən. Hər şey hüquqi müstəvidə baş verir”.
Aytəkin Qardaşova
