Olaylar.az xəbər verir ki, bunu BMT Baş Assambleyasının 72-ci sessiyasının sədri Miroslav Layçak XIII Qlobal Bakı Forumunda "Keçid dövründə dünyadakı fikir ayrılıqlarının aradan qaldırılması" mövzusunda çıxışında bildirib.
Onun sözlərinə görə, bir çox inkişaf etməkdə olan ölkələr və bütöv regionlar hələ də qlobal idarəetmə sistemində kifayət qədər təmsil olunmur, Təhlükəsizlik Şurasında veto hüququ bəzən qanunsuz tətbiq edilir və ya siyasi məqsədlərlə istifadə olunur.
"İslahatlar hər hansı bir dövlətin razılığına bağlıdır. Dəyişikliklər yalnız üzv dövlətlərin razılığı ilə mümkündür. Birləşmiş Millətlər Təşkilatı 193 ölkəni birləşdirir və məhz onlar mövcud sistemi islah etməyə səlahiyyətlidir", - deyə o qeyd edib.
Layçak vurğulayıb ki, bu gün məsələnin mahiyyəti BMT-nin XXI əsrdə dünyaya lazım olub-olmamasında deyil, təşkilatın müasir və gələcək çağırışlara necə uyğunlaşdırılmasında durur.
Onun sözlərinə görə, ilk növbədə, gündəm yenidən nəzərdən keçirilməlidir.
"Biz bilirik ki, BMT ənənəvi olaraq təhlükəsizlik, inkişaf və insan hüquqları məsələləri ilə məşğul olur. Lakin bu gün təhlükəsizlik yalnız hərbi təhdidlərlə məhdudlaşmır. O, inkişaf, iqlim, səhiyyə və iqtisadi sabitliyi də əhatə edir. Effektiv qlobal idarəetmə üçün təşkilat yeni vəzifələri yerinə yetirməyə hazır olmalıdır - məsələn, süni intellekt, rəqəmsal idarəetmə, kibertəhlükəsizlik, qlobal bərabərsizlik, iqlim dəyişikliyi, miqrasiya, kütləvi köçlər və pandemiyalara hazırlıq", - deyə o qeyd edib.
Layçak həmçinin bildirib ki, ikinci əsas istiqamət BMT-nin iş mexanizmlərinin islahatıdır, xüsusilə də təmsilçilik sahəsində.
Onun sözlərinə görə, Qlobal Cənub ölkələri, xüsusən də Təhlükəsizlik Şurasında daha güclü səsə malik olmalıdırlar.
"Bir o qədər vacib məsələ də BMT-yə zəruri resurslar və effektiv koordinasiya mexanizmləri təmin etməkdir. BMT-dən tez-tez əlavə nəticələr gözlənilir, lakin dövlət üzvlərindən müvafiq maliyyə və siyasi dəstək yoxdur. Bu vəziyyət dəyişməlidir", - deyə Layçak vurğulayıb.
