Cəmiyyətimizdə təəssüf ki, bəzi hallarda əcnəbi vətəndaşlara qarşı dələduzluq faktlarına rast gəlinir.
Bəs belə hallarda əcnəbi vətəndaşın hüquqları hansı qaydada tənzimlənir?
Mövzu ilə bağlı Pravda.az-a açıqlama verən hüquqşünas Afaq Əliyevanın sözlərinə görə, bu hal Azərbaycan Respublikasının Cinayət Məcəlləsinin dələduzluq və aldatma ilə bağlı maddələrinin tərkib əlamətlərinə uyğundur:
“Zərərçəkmiş şəxs əcnəbi vətəndaşdır və bu səbəbdən onun hüquqlarının müdafiəsində beynəlxalq-hüquqi aspekt də nəzərə alınmalıdır. Kompleks yanaşma tələb olunur: hüquqi müşayiət, sübutların toplanması, hüquq-mühafizə orqanları ilə qarşılıqlı fəaliyyət və zərurət olduqda beynəlxalq strukturlarla əməkdaşlıq. Dələduzluq faktını dərhal sənədləşdirmək lazımdır. Bununla bağlı aldatma faktını təsdiq edən bütün sənədləri, yazışmaları və maliyyə əməliyyatlarını toplamaq vacib amildir. Müqavilələr, qəbzlər və ödəniş tapşırıqlarının surətləri çıxarılmalıdır və hüquq-mühafizə orqanlarına müraciət edilməlidir. Mövcud bütün sübutları göstərməklə dələduzluq faktı barədə rəsmi ərizə təqdim edilməli, zərərçəkmiş şəxsin əcnəbi vətəndaş olduğu qeyd edilməlidir ki, beynəlxalq aspekt nəzərə alınsın. Həmçinin bu işlərlə bağlı peşəkar vəkil və lisenziyalı auditor cəlb edilə bilər. Hüquq şirkəti hüquqi əsasları təhlil etməli, iddia ərizəsi hazırlamalı və zərurət olduqda məhkəməyə müraciət etməlidir. Auditor ekspertizası dəymiş ziyanın dəqiq məbləğini müəyyən etməyə kömək edəcək”.
Onun sözlərinə görə, vətəndaş istintaq dövründə zərərçəkmişin ölkəsindən kənarda yerləşirsə, hüquqların qorunması üçün beynəlxalq-hüquqi mexanizmlərdən istifadə edilə bilər: “Konsulluğa və ya diplomatik kanallara müraciət imkanları nəzərdən keçirilməlidir. Beynəlxalq səviyyəli peşəkarların iştirakı ilə kompleks yanaşma zərərçəkmiş şəxsin hüquqlarını maksimum dərəcədə qorumağa və dəymiş ziyanın ödənilməsinə nail olmağa imkan verəcək”.
Şəhanə Quliyeva
