ain.az, Ses qazeti portalından verilən məlumatlara əsaslanaraq xəbər verir.
2026-cı ilin mart ayı Azərbaycanın xarici siyasət gündəmində mühüm bir mərhələ kimi tarixə düşdü. Martın 11-də Bakıda rəsmi səfərdə olan Avropa İttifaqı Şurasının Prezidenti Antonio Koşta ilə keçirilən görüş, həm regionun yeni reallıqlarını, həm də Azərbaycanın Avropa ilə strateji tərəfdaşlığının gələcək konturlarını müəyyən etmək baxımından müstəsna əhəmiyyət kəsb etdi. Bu görüş zamanı Azərbaycan Respublikasının Prezidenti cənab İlham Əliyevin səsləndirdiyi "Cəmi yeddi aydır ki, sülh şəraitində yaşayırıq" bəyanatı sadəcə bir zaman kəsiyini deyil, həm də Cənubi Qafqazda onilliklər boyu davam edən qanlı münaqişənin tamamilə bitməsinin və yeni bir dövrün – davamlı sabitlik erasının başlanmasının rəsmi elanı oldu. Bu bəyanatın mahiyyətində dayanan ən böyük həqiqət odur ki, Azərbaycan öz ərazi bütövlüyünü və suverenliyini tam bərpa etdikdən sonra regionda sülh artıq bir arzu deyil, əlçatan və reallaşan bir faktora çevrilib. Prezident İlham Əliyev Antonio Koşta ilə söhbətində vurğuladı ki, ötən illər ərzində Azərbaycan beynəlxalq hüququn bərpası naminə həm hərbi, həm də diplomatik müstəvidə nəhəng mübarizə aparıb. İndi isə ölkəmiz bu sülhü qorumaq, möhkəmləndirmək və iqtisadi inkişafa çevirmək mərhələsindədir. "Yeddi aylıq sülh" ifadəsi, əslində, Azərbaycanın işğaldan azad edilmiş torpaqlarında bərpa işlərinin geniş vüsat aldığı, minalardan təmizlənmə prosesinin sürətləndiyi və "Böyük Qayıdış" proqramının uğurla icra edildiyi bir dövrün simvoludur. Azərbaycan bu qısa müddət ərzində sübut etdi ki, müharibədən çıxmış bir dövlət qısa zamanda quruculuq meydanına çevrilə bilər. Avropa İttifaqı ilə münasibətlərin kontekstində bu sülh bəyanatı həm də yeni enerji və nəqliyyat marşrutlarının təhlükəsizliyi deməkdir. Prezident İlham Əliyev qeyd etdi ki, Azərbaycanın təqdim etdiyi sülh gündəliyi yalnız iki ölkə arasında deyil, bütövlükdə Avrasiya məkanında sabitlik və proqnozlaşdırılan gələcək vəd edir. Antonio Koşta ilə aparılan müzakirələrdə Azərbaycanın Avropanın enerji təhlükəsizliyindəki rolu, xüsusilə "Yaşıl Enerji" dəhlizləri və Xəzər dənizindən Avropaya qədər uzanan yeni infrastruktur layihələri ön plana çəkildi. Bu layihələrin həyata keçirilməsi üçün isə fundament məhz həmin o sülhdür. Dövlət başçısı bəyanatında bir daha xatırlatdı ki, Azərbaycan heç vaxt müharibə tərəfdarı olmayıb və hər zaman sülh müqaviləsinin imzalanması üçün konstruktiv təkliflərlə çıxış edib. Bu gün yaşanan yeddi aylıq tam sülh mühiti Azərbaycan xalqının iradəsinin və dövlətin uzaqgörən siyasətinin nəticəsidir. Bu müddət ərzində regionda heç bir hərbi insidentin baş verməməsi, delimitasiya və demarkasiya proseslərində əldə olunan irəliləyişlər sülhün kövrək deyil, əksinə, möhkəm sütunlar üzərində qurulduğunu göstərir. Prezident İlham Əliyev Avropa İttifaqı Şurasının rəhbərinə mesaj verərək bildirdi ki, beynəlxalq birlik bu yeni reallığı tam qəbul etməli və Ermənistanın revanşist meyillərdən tamamilə uzaqlaşması üçün təsir rıçaqlarından istifadə etməlidir. Cəmi yeddi aydır davam edən bu sülh Azərbaycan üçün həm də iqtisadi intibah dövrüdür. Qarabağ və Şərqi Zəngəzurda ucaldılan "ağıllı kəndlər", açılan beynəlxalq hava limanları və çəkilən magistral yollar bu sülhün bəhrələridir. Prezident İlham Əliyevin bu strateji bəyanatı bir tərəfdən beynəlxalq tərəfdaşlara "Azərbaycan öz üzərinə düşən missiyanı yerinə yetirdi" mesajını verirsə, digər tərəfdən gələcək nəsillər üçün təhlükəsiz bir coğrafiya qurulduğunun təminatıdır. Avropa İttifaqı ilə imzalanması gözlənilən yeni tərəfdaşlıq sazişi də məhz bu sülh mühitinin bəxş etdiyi imkanlar çərçivəsində daha real görünür. 11 mart görüşü və orada səslənən "Yeddi aylıq sülh" bəyanatı Azərbaycanın qalib dövlət kimi regionda diqtə etdiyi yeni əməkdaşlıq modelinin təqdimatıdır. Bu sülh təkcə silahların susması deyil, həm də Zəngəzur dəhlizinin açılmasına, yeni ticarət əlaqələrinin qurulmasına və Qafqazın dünyanın ən inkişaf etmiş regionlarından birinə çevrilməsinə doğru atılan böyük addımdır. Prezident İlham Əliyevin vurğuladığı kimi, Azərbaycan bu yolda qətiyyətlə irəliləyir və regionun gələcəyini məhz sülh, qarşılıqlı hörmət və birgə inkişaf üzərində inşa edir.
Nicat Quliyev
YAP Laçın rayon təşkilatının məsləhətçisi
Sonrakı hadisələr barədə daha çox məlumat almaq üçün ain.az saytını izləyin.
