Livan prezidenti İsrailə bir aylıq atəşkəs təklif edib » AzadMedia.az

Livan Prezidenti Joseph Aoun İsraillə bir aylıq atəşkəs elan olunmasını təklif edib. Bu barədə məlumatı Asharq Al-Awsat qəzeti Beyrutdakı diplomatik mənbələrə istinadən yayıb.

Məlumata görə, dövlət başçısı sülh təşəbbüsünü İsrail tərəfinə Livandakı ABŞ səfiri Michael Issa vasitəsilə çatdırıb. Aun bildirib ki, bir aylıq atəşkəs Livan ordusuna hökumət tərəfindən təsdiqlənmiş planı həyata keçirməyə və ölkədə fəaliyyət göstərən qeyri-qanuni silahlı qruplaşmaların silahlarını toplamağa imkan verəcək.

Livan prezidenti vurğulayıb ki, hərbi əməliyyatların davam etdiyi şəraitdə belə bir əməliyyatı həyata keçirmək mümkün deyil. Onun sözlərinə görə, İsrailin quru, hava və dəniz istiqamətlərində hərbi fəaliyyətinin artması dövlətin silah üzərində tam nəzarət qurması prosesini çətinləşdirir.

Məlumatda qeyd olunur ki, martın 9-da Livan prezidenti İsraillə birbaşa danışıqlara başlamağa hazır olduğunu da açıqlayıb. O bildirib ki, təhlükəsizlik tədbirləri ilə bağlı razılaşma regionda gərginliyin azalmasına və işğalın dayandırılmasına kömək edə bilər.

Aun həmçinin bəyan edib ki, Livandakı şiə silahlı qruplaşması **Hezbollah ölkəni regional münaqişəyə cəlb edib və bu addım müharibələrdən və onların nəticələrindən yorulmuş livanlıların böyük əksəriyyətinin iradəsini nəzərə almır.