Azərbaycanda vətəndaşların hüquqlarının qorunması və maliyyə şəffaflığının təmin edilməsi istiqamətində mühüm addım atılıb. Baş nazir Əli Əsədovun imzaladığı yeni qərarla, artıq ödənilmiş, düzgün tətbiq edilməmiş və ya səhvən ödənilmiş inzibati cərimələrin vətəndaşlara geri qaytarılması qaydası rəsmən təsdiqlənib. Bu qərar, dövlət büdcəsinə və ya müvafiq icra orqanlarının hesablarına daxil olmuş vəsaitlərin qanunvericiliklə müəyyən edilmiş hallarda qismən və ya tam şəkildə geri ödənilməsini nəzərdə tutur. Xüsusilə nəqliyyat sahəsində tətbiq edilən cərimələrin çoxluğunu nəzərə alsaq, bu mexanizmin işə düşməsi minlərlə sürücü üçün ədalətli maliyyə kompensasiyası imkanı yaradır.
Məsələ ilə bağlı NOCOMMENT.az-a danışan nəqliyyat eksperti Tale Ələddinzadə qeyd edib ki, bu qərar sürücülər tərəfindən uzun müddətdir gözlənilən bir hüquqi akt idi:
“Nəqliyyat sahəsində inzibati cərimələr ən çox mübahisə doğuran mövzulardan biridir. Çox vaxt texniki xətalar, eyni qayda pozuntusuna görə iki dəfə cərimə yazılması və ya məhkəmə tərəfindən ləğv edilən cərimələrin artıq ödənilmiş olması vətəndaşlar üçün problem yaradırdı. Bu vaxta qədər həmin vəsaitlərin geri alınması mexanizmi mürəkkəb və qeyri-müəyyən idi. Lakin Tale Ələddinzadə vurğulayır ki, yeni təsdiqlənmiş qaydalar vətəndaşın öz pulunu geri alması üçün şəffaf bir yol xəritəsi cızır. Artıq vətəndaş sübut edə bilsə ki, cərimə səhv tətbiq olunub və ya sistem xətası nəticəsində artıq ödəmə edilib, dövlət həmin vəsaiti tam şəkildə geri qaytarmaq öhdəliyini üzərinə götürür”.
Ekspert həmçinin bu qaydanın praktikada necə tətbiq olunacağına toxunaraq bildirib:
“Bu yenilik həm də nəqliyyat sahəsindəki səlahiyyətli qurumların məsuliyyətini artıracaq. Çünki hər bir səhv tətbiq edilən cərimə sonda dövlət büdcəsindən və ya qurumun öz hesabından geri ödəmə tələb edəcək. Sürücülərə tövsiyə edirəm ki, ödəniş etdikdən sonra qəbzləri mütləq saxlasınlar və cərimənin qanunsuzluğu barədə məhkəmə qərarı və ya yuxarı instansiyanın rəyi olduqda dərhal geri qaytarılma üçün müraciət etsinlər. Tale Ələddinzadə qeyd edib ki, bu addım həm də rəqəmsal hökumət quruculuğu çərçivəsində ‘ASAN ödəniş’ sisteminin daha da təkmilləşdirilməsinə və vətəndaş məmnuniyyətinin artmasına xidmət edəcək. Bu qaydaların tətbiqi ilə biz nəqliyyat sistemindəki maliyyə münasibətlərində yeni və daha ədalətli bir dövrün şahidi olacağıq”.
Tunar
NOCOMMENT.az
