Dehli və Tehran Hindistan tankerlərinin keçidi məsələsini ayrı-ayrılıqda müzakirə edir, artıq ilk gəmilər boğazdan təhlükəsiz keçib...
Poliqon xəbər verir ki, Hindistanın xarici işlər naziri Subramanyam Cayşankar Financial Times qəzetinə müsahibəsində Dehli ilə Tehran arasında Hindistan gəmilərinin Hörmüz boğazından keçidi ilə bağlı aparılan danışıqların müəyyən nəticələr verdiyini bildirib.
Nazirin sözlərinə görə, Hindistan hazırda İran tərəfi ilə bu məsələni aktiv şəkildə müzakirə edir. O qeyd edib ki, danışıqlar nəticəsində müəyyən razılaşmalar əldə olunub və bu, Hindistan bayrağı altında üzən gəmilərin bölgədən təhlükəsiz keçidinə imkan yaradıb.
“Hazırda mən iranlı tərəfdaşlarla danışıqlar aparıram və bu danışıqlar müəyyən nəticələr verib”, – deyə Subramanyam Cayşankar bildirib.
Bununla yanaşı, Hindistan XİN rəhbəri vurğulayıb ki, Dehli ilə Tehran arasında Hörmüz boğazından tankerlərin keçidi ilə bağlı hərtərəfli və ümumi razılaşma imzalanmayıb. Onun sözlərinə görə, hər bir gəminin keçidi ayrıca müzakirə olunur və razılaşdırılır.
Cayşankar həmçinin qeyd edib ki, bu proses çərçivəsində İran Hindistandan heç bir qarşılıq almayıb. O əlavə edib ki, bir sıra Avropa İttifaqı ölkələrinin də hazırkı vəziyyətlə bağlı İranla danışıqlar aparmaq cəhdlərindən xəbərdardır.
Xatırladaq ki, martın 14-də Hindistanın NDTV televiziya kanalı Hindistanın Shipping Corporation of India şirkətinə məxsus iki mayeləşdirilmiş qaz tankerinin Hörmüz boğazından uğurla keçdiyini xəbər vermişdi. Hindistan bayrağı altında üzən bu gəmilər Shivalik və Nanda Devi adlanır.
Məlumata görə, həmin əməliyyat xüsusi ehtiyat tədbirləri görülməklə həyata keçirilib. Tankerlərin təhlükəsiz keçidi İranın və həmçinin Fars körfəzi regionunda yerləşən digər ölkələrin dəstəyi ilə təmin olunub.
Bundan əvvəl, martın 12-də bəzi KİV-lər İranın Hindistan bayrağı altında üzən tankerlərin Hörmüz boğazından keçməsinə icazə verdiyini bildirmişdi. Bu razılığın İran və Hindistanın xarici işlər nazirləri arasında aparılan danışıqlar nəticəsində əldə olunduğu qeyd olunurdu.
Bu məlumatı İranın Dehlidəki səfiri Məhəmməd Fəthəli də təsdiqləyərək bildirib ki, Tehran Hindistan gəmilərinin regiondan təhlükəsiz keçidini təmin etmək üçün diplomatik kanallar vasitəsilə əməkdaşlıq edir.
Ekspertlər hesab edir ki, Hörmüz boğazı üzərindən enerji daşıyıcılarının daşınması qlobal enerji bazarı üçün strateji əhəmiyyət daşıdığından Hindistan və İran arasında bu mövzuda əldə olunan razılaşmalar regionda ticarət və enerji təhlükəsizliyi baxımından mühüm rol oynaya bilər.
Poliqon.info
